The ZOPA

Blog thar ka buaipui leh mek a...helamah hian lo leng lut hrih mai teh please....

http://thezopa.blogspot.com

LUSUN HNEM

March 25 2013 (Thawhtan zan) khan kan thenawm Pu Biakdika te inah nupain kan leng a. Kan len chhan chu Nl. Hlumami a riah luh vang a ni. Hlumami hian a nu Pi Sialmani a sun a, a khawhar hi kan lenpui ve e kan ti a.  Pi Sialmani chu Tahan, Burma khaw sattu fanu a ni a, Kohhran hmeichhe lama mi tangkai tak, mize tha tak nei a ni a. Kawl ram lam mite chuan an hriain an sun hle reng a ni.

Nl. Hlumami chuan a nu thih thu hi inrinni in a hre tawh a. Mahse tul eng eng emaw vangin kan leng ve lawk hman lo va. Vanneihthlak ang reng takin kan thenawm lawkah amah a rawn insawn hnai a, tichuan len vena rem chang tak kan nei ve thei ta kha a ni a. An ni hi Mizo Methodist Kohhran  mi leh sate an ni a. Kan va len zan pawh chuan Methodist Kohhran hruaitute an lo awm laih laih tawh a. Chutia kan han punkhawm tak nialah chuan hunserh tan mai an rawt ta a. Kei chu hrilhlawkna pawh awm chuang lo chuan inkhawm hruaitu atan min pawt chawp a. "Hei thuhriltu tur pastor Rodawla pawh a awm tawh tan mai ang, nangin inkhawm hruai la," an ti ta tlat mai a. Tan theih miah loh turin ka banah an kai a, min hnuk ta dawt dawt mai a. Hreh tak chungin ka hruai ta a ni.

Inkhawm ban chuan Mothodist Kohhran Upa min Pu Hruaia a lo ding chhuak a,"Naktuk zan pawh zan dar riatah bawk hun serh kan hmang leh ang a, thuhriltu atan zanina kan inkhawm hruaitu hi ni mai se," tiin a puang ta kulh mai a. Inkhawm ho lah chuan, "A tha ang," an lo ti tliar tliar a. An pastor Rev. Biakchhunga pawh chuan, " Anin thu a sawi dawn phawt chuan ka lo kal leh ang, a thusawi hi ka la ngaithla ngai lova," te a la ti tak deuh deuh a. Dan pangngaiin kan tang kual leh ngial a, mi dang te kan rawt kual vel a, ka thu leh hla an bengah a lut lo hle. Mahni lo maha thusawi hreh nak alaiin, hun lah chu an bichilh em em mai leh nghal a, ka huphurh ngei mai.

A tuk zanah chuan hun pangngaiah bawk kan tan leh  ta a. Pu Hruaian inkhawm a kaihruaia kei chuan thiam ang angin thuchah chu ka sawi ve  ta a, a hnuaia mi ang hian:-


"Zaninah thusawi turin min ruata ka huphurh em em a ni. Thusawi thiam loh nak laiin hun a bichilh a, chu a chhapah duh duh rawnga sawi mai ni lovin, thlamuanna thuchah lam hawi a ngai kher hmel bawk si, nizan leh tun inkar hun a tawi duh ngei mai! Eng pawh nise kan sawi sei lo ang a, kan tlingtla thuai mai ang chu.

"Kan Bible chang inghahna chu chang lar tak, mitinin kan hmelhriat em em, Isuan engthawlna thu a sawi hi a ni ang a. Mathaia 5:4 thu hi a ni.

"Lungngaite chu an eng a thawl e; thlamuanin an la awm dawn si a," tih thu hi.

"Lusun inhnemna hmunah hian  Rom 12:15 thu, 'Lawmte chu lawmpui ula; tap te chu tahpui rawh u,' tih thu hi a langsar em em a, sawi pawh a hlawh. Hei tho hi em ni ka sawi ang aw tiin ka inngaihtuah a, mahse Pathianin rem chang takin a chunga chang thlan Mathaia ziak a mi hi min rawn pe ta zawk a, ka lawm em em a ni.

"Tawng bul lam te kan hre pha ve lo va, mahse sap tawng Bible kan keu chuan he lai chang 'Lungngaite chu an eng a thawl e, thlamuanin an la awm dawn si a, tih hi Mizo tawng ngial ngana kan lehlin chuan, 'Lusun te chu an eng a thawl e, hnem an la hlawh dawn si a,' tihna a ni. Helai chang atang hian Isuan lu kan sun a remtihzia kan hmu a, lusun te a dem lo a ni. Mi tam tak chuan thihna hi a hlim zawnga hman an tum thin a, a life celebrate zawngin an sawi a, intihhlim hram hram an tum a, hlimna ni a ni an ti thin. Chutianga ti thei te chu an fakawm a, kan dem hauh lo. Mahse kan chhungte, kan thiante kan sun hian kan zawmpui pengte chan kan nih avangin a na a, kan ui a, kan tuar a, kan sun lo thei lo.

ISUAN LU A SUN
"Isuan lu kan sun hi a hre thiam em em a ni. A chhan chu a ni pawhin lu a sun ve tawh tlat. A unaupa Johana chu a lu tansak a nih khan a sun a, a tuar hle ta ve ang. A thih thu Johana zirtirten an va hrilh thuai a nih kha. Tin Lazara a thih tum khan Isua mittui a tla a, Isua mittui tla kan hmuh chhun chu hemi tum hi a ni mai niin a lang. Isua hian lusun awmzia a hria a, hmangaihte inkalsan natzia a hria a ni. Chuvang chuan kan then takte ngai a kan kun tlawk tlawk lai te, tawp hlei thei lo khawpa kan tah hawm hawm lai te, tap hlei thei lo khawp a kan hnang awl awl lai te hian Isuan kan lusunna hi min hriatpui a, min dem lo. Min dem lo chang pawh a ni lo, min thlamuan a, hnem kan la nih tur thuin min zakham a ni.


SERMON THUL KHUNG
"Isuan rawng a bawl tan dawn khan thlalerah ni 40 leh zan 40 fianrial hun a hmang a. Chu hunah chuan Setana pawhina  rawn thlem a nih kha. Khami hnu lawk khan rawng a bawl tan a, damlo te a ti dam a. A thuchah sawi hmasak ber chu he engthawlna thu hi a ni. He engthawlna thuah hian mi chanhai, chen beh te, a lainat zawng mi te a rawn hawlkim hle a. Chung zinga a pahnihna chu lusun te hi an ni. Vawikhat chu pastor pakhat kan venga a rawn awm tirh hian a thusawi hmasa berah thu ropui tak mai tha zet mai hi a sawi a, a ngaithlatute chuan sawi tha an ti em em hlawm a. A awm rei hret hret a, a hmasa ber ang kha chu a ni chho fo ta lo va, ' A sermon thul khungin bul a rawn tan alawm' an ti fiamthu thin a. Chutiang deuh chu thil kalphung a nih dawn chuan Isua pawh hian a sermon hmasa berah chuan a sermon thulkhung a phawrh ve pawh a ni mahna! A sermon tha ber a sawi hmasa ber a nih kher loh pawhin, a ngaih pawimawh ber chu a sawi hmasa ber a ni chiang mai. Chu a thu sawiah chuan LUSUN te hnemna a dah pawimawh em em a ni.

LU KAN SUN EM
"Isuan lusun te dinhmun a hriat thiam em avang hian lu hi kan sun tur a ni. Kan chhungten min kalsan a, chatuan ram min pansan lai hian mi thenkhat chu lu sun thei miah lo te, thenkhat chu tap thei miah lo te kan awm. Thenkhat te phei chuan an  tuar miah lo emaw tih tur te an awm thei. A vanduaithlak zawk em em a ni. Kan chhungte, kan unaute, kan thian te kan thenawm ten min kalsan laia kan thinlung he thihna hian a khawih che miah lo a nih chuan eng ang taka mi sehhel leh lainatna nei lo nge kan nih ang aw a tih theih. Thinlung sak, bul hnaia mite, thisen zawmpuite tuarna pawhin a tihtui zawh loh te kan lo nih hlauh chuan a vanduai thlak em em zawk a ni. Chuvangin kan lung a chhiat te, kan tah a chhuak a nih te hian insum a ngai lo, kan tuar tur a ni a, kan sun tur a ni. Isuan min hrethiampui em em a ni. Lusun lo te chuan hnem an mamawh lova, hnemtu atan Isua an mamawh thin lo. Amah kan mamawhzia, amah kan hnaih a tulzia kan hriat chhuah nan a chang chang chuan kan hriat thiam loh zawng pawhin Pathianin rem a rawn ruat thin a, kan tuar em em turin thihna te a lo thleng thin. Isuan lu kan sun a duh hun a awm thin. Heng hunah hian a nih tur ang ngeiin lu kan sun a, kan tuar a, kan mangan a, Amah kan auh hi a mawi em em a ni.

SUN AWM KAN NI EM
"Hmanni khan internet atangin mi ngaihnatawm ber ber te ka zawng khawm a. Nelson Mandela, Roger Federer, Mother Teresa, Mahatma Gandhi te an langsar hle mai. Heng mite hi miten eng vangin nge an ngaihsan aw tih ka ngaihtuah a, a chhanna ka hmuh tak chu, heng mite hian an mahni tanghma an hai lo mai a ni lo va, an dik em em a, mite tan an lo inpe nasa, an insengso nasa em em a ni tih hi a ni. A bik takin Mother Teresa te, Pu Gandhi te phei chuan an nun mite tan an hlan a, an mahni nawmsakna atan a thawk nep em em mai. An thih hnu pawh khan bungrua hnut chhiah ro thil an nei tlem hle a ni.

"Ringtute entawn tur Isua Krista hian a nun pum mite tan  a hlan a, a bo a bang awm lovin a engkim a hlan a, a thih hnu khan ama bungrua hnut chhiah eng mah a nei lo. Mite tana inpe, mahni in theihnghilh hote hi kan lo ngaina mai a lo ni. Chung mite chu an thihin kan sun lo thei lo. Kan ui lo thei lo. Tam tak hi chu he khawvela kan awm chhung hian kan han chet vel danah uiawm awm leh thih hnua han sun ngawih ngawih awm hian kan nung lo ve bawk a! Mahni tan ngar ngar kan tul a, mi dang hre chang lo lekin, dik leh dik lo pawh thlu lovin kan inhai vur a. Mite chuan tlachham se, keiin ka neih phawt chuan pawi kan ti thin lo. Isua zirtirna nen a inkalh thak a ni. Chuvang chuan he khawvela kan awm chhung hian mi dangte ngaih pawimawh a va tha em, mi dangte tana inpek a va hlu em chutiang ti mite chuan van nun an tem a, an nun a hlim a; an thih hnu thlengin ui leh ngaih an hlawh thin. Chung chu a ni kan sun tur chu, chung suntute chu a ni Isuan hnem a duh a, 'Lusunte chu an eng a thawl e, hnem an la hlawh dawn si a' a tih ni.

"Chuvangin unau duh tak, kan velah lusun an awm em, i tuarpui ang u, kan chhungkhat laina an boral em, i sun ngawih ngawih ang u. Keini hi kan hun a thlen ve hunah uiawm leh sun awm kan ni ve ang em, kan nun i inbih nawn leh thin ang u. Pathianin a thu kan sawi te kan za tan malsawm rawh se, Amen."

ISUA KHAWNGAIH HLAWH

Chang thlan : Marka 8:2

“Mipuiho hi tunah ni thum ka hnenah an awm tawh a, ei tur an neih loh avangin ka khawngaih em em a ni.”

Ringtute hian kan thlakhlelh ber nia ka rin thin chu, Isua hriat chian nih te, a duhsak nih te, a lainat em em nih te hi a ni mai awm e. A tuate pawh hian tlak tlum te, dusak te, tlawn te, biak that te, zah kai te, hriat hlawh te kan duh thin a. Then khat phei chuan hriat hlawh chang an duh lova, mi hre tam em em nih te an chak a, lar em em ni ang a lan an tum a; tlang tla riau nih te kan chak thin.

A chunga Bible changah hian Isuan mipuite chu a khawngaih em em thu a sawi a. A khawngaih chhan hi ni thum lai chaw ei lova a thu leh hla an ngaihthlak tawh vang a ni tih a lang nghal a. A Bible chang kan chhiar zel chuan Isuan mipui te chu a hrai puar ta a, tlai takin mipui mi 4000 lai  an in lamah a hawtir ta a ni awm tak a ni.

Isua khawngaih hlawh dan:
Isua khawngaih hlawh tur te, a thil mak tih te hmu ve tur te, leh a thiltih theihna te puarpui ve tham tur chuan Amah Isua sawi dan takah “ Mahni hrehawm pawisa lova, nitin Kross pua zui” a ngai tlat a ni( Mat 16:24) Engmah chan lo, engmah hloh lo, engmah hrehawm mah tuar lo, engmah kalsan lo chuan Isua khawngaih ni ve rual a ni lova, a thil mak tih te hmuh ve phak ani lova, a hausakna chanpui ve chi a ni lo.  Isua khawngaih mipui 4000 te hian ni thum teh meuh Isua thusawi an ngaithla a, riltam teh mahse tumah an haw ru lo a nih hmel! Mawngkham teh mahse an thu ve talh talh a, mut chhuakin ham ham  mahse Isua an kalsan phal lo.

Ni thum an ral meuh chuan Isua a che lo thei ta lo. Miin a thu an awih a, a thu leh hla an ngaih thlak peih a, an mahni nawm leh nawm loh ngaihsak lo leka Amah an zui a, an chen chilh tlat chuan Isua a che lo thei lo. Isua hi a chang chang a darkar hnih khat lek lek zuiah a che mawh khawp. Chaw ngheiin, tlaivarin, khawvel thil dang zwng zawng dah thain mi te chuan Isua an lo zui a, an lo chen chilh a. Ni khat mai ni lo, ni hnih ni thum te, kar khat te, thla mai ni lo a kum a kum te pawh miin Isua an lo zui a, tichuan Amah an hmu chiang thin. Chutah zet chuan A khawngaih an hlawh a, Amah nen  inlai chinna thuk tak an nei thin.

Kohhrana Tel ve:

Isua lainat ni tur hian mi tam tak chuan a kalkawng kan hre kher lo thei a. Engti taka mahni hrehawm pawisa lova mahni Kross pua zui tur nge pawh kan hre kher lo thei. Isuan mipui 4000 a hrai lai hi ngaihtuah ta ila. An zingah hian thalai pawh tam tak an awm ve ang a. A then chu huau huau lawm ve hrim hrim te, a then chu thathona sang tak nei chuang lo; awm chho ve laklawh te pawh an awm ang. A then te phei chu peih lo chung chunga nu leh pa te thu awih vanga awm ve te pawh an awm mahna. Amaherawchu chung zawng zawng chu Bible hian a chhui tawh lo va, mi 4000 te chuan Isua thiltih ropui an mit ngeii an hmu a, an beng ngeiin hria a, an ka ngeiin an tem ta a tih kan hria. Isua hian Amah zuitu Kohhran ho hi a khawngaih thin a, A taksa a ni bawk reng a. Kohhranah chuan mi chi hrang hrang an awm ngei e, mahse a huho hian Isua tan a hlu a, a hu ho hian Isuan a khawngaih a, a huho hian Isuan ei tur pek a duh a ni. A mi mal taka kan lo tui falna emaw; kan lo tui loh falna emaw hi a lang tawh lo va, a pawimawh ber pawh niin a lang lo. Kan nih ang ang hian Kohhran hovah hian tel ve ila, an zingah awm ve tlat ila, Kohhran ho ke pen angin pen ve zel ila, kan tlat fal loh ngat chuan a hun takah Isua khawngaihna Kohhran ho zarah kan la hlawh ve ang a, a thilmak tih te kan mitin a la hmu ve ang a, a hamthatna te pawh a tul phawt chuan kan la tem ve ngei ang. Amen.

REPORT ON MIZORAM TRIP

I left Mizoram in 2000 and had gone back three times since then. The last time I went back was on December of 2003. Since the last time I visited Mizoram, it's been about  ten years and a lot of things have changed.

Some of my friends go back to Mizoram to visit every once in awhile. After they return from Mizoram, I  am always interested in listening to their experiences during their stay. I want to share with you some of the experiences they have related to me. To me some of their feelings they expressed regarding their trip were reminiscing, some were frustrating, some were amusing and most of them were heart-rending. These are the four different insights by four different observers:

Starting from the last person to return who came back a month ago, she lamented, "Our Mizoram has totally changed! I went back after a long time absence, I expected to see the same old Mizoram but it has become something I don't understand. I don't know.. probably like...I have never been to Chin Hills, but I am afraid Mizoram has become West Chin Hills. Everybody seems to know what SANPIAU, Laphetoh etc. were; which we never knew before. It is sold in the restaurant and people seems to love it. Where is our own sawhchiar, our very own thingpui? And also people have financial hardship and had to sell their plot of land. They never care who bought the land as long as it is sold at  good price. Therefore, many outsiders from Burma, Manipur Vairam have bought lands and I am scare we are truly  doomed to be assimilated! It is believed that some who has a lots of money, who had bought good locations in our city and other towns might have got from dirty jobs. Once, our Church Elder even announced in our local church that, if members want to sell their land they  should carefully see to whom they were  selling their land to. For Mizoram is the only Land we had, we need to protect it patriotically...  Vegetables vendors in the street are mostly from outside Mizoram, they work harder, longer...., they start simple and small, but in no time they overtake all the existing local vendors...very disgraceful indeed."

Another friend who returned from Mizoram also said, "We went to the Millennium Shopping center. It was new and people were proud of it. There was an elevator too. As I was with my boy we chose to use the elevator to go up. Just before the door was closed, two tlangvals ( here I can't use gentlemen) squeezed in, and as a result the elevator won't work. Obviously we were too heavy for the machine, and some people shouted out, 'we are too heavy, somebody please leave.' The two tlangvals got offended and stamped at the elevator floor cursing, 'Might as well be destroyed,' I was so dismay at their action and attitude, it took me a while to ponder when  can we treat our land and property respectfully."

My friend went to Mizoram about a year ago but gave me a surprizing positive report, he said, "When I lived in Aizawl some 20 years ago, there were not many businesses one could do with good profit. People were poor and we were thinly populated. But now, in my last trip, I clearly found that any kind of business can be successful. We have the market, we have the finance, what else do we need? Just start any business, there's enough customers for one to survive provided you work hard." 

Lastly, another male friend who made a trip some three years ago admiringly told me this. 

"For some reason (consecutive flight cancellation) I had to enter Mizoram from Manipur. From Imphal we drove via Churachandpur. There were about seven check points between Churachandpur and Mizoram border, all run by different rebel groups. In each check point we were stopped and interrogated by the insurgent  personel. It was so nervewrecking and some time really dangerous. I have become an US citizen and I was not sure what they would do to me if I told them who I really was. We heaved a sigh of relief as we passed the first check gate, we didn't know another was waiting! And there we went, seven check posts in succession. My brow got dampen all the way because of nervousness!

There was no power for four nights in Imphal and there were none in another towns too. It was really a miserable experience we had in Manipur. Then finally we reached the Mizoram border. As soon as we crossed the Mizoram border we lost all our stress. We couldn't explain exactly how our anxiety had gone. We were simply relieved, no no..we felt so secure, protected rather, but mostly, we felt at home for sure. The first village we came across was Khawdungsei. We stopped and decided to take a break in one of the houses. There we found a TV with crisp clear picture..with a Mizo program! They have the power, they have lots of water, and a computer too huh!

'There's a lot of water, feel free and cool yourself down,'  a woman in the house said to us...the first Mizo person we met; she was so hospitable, so graceful. The land so peaceful, and so progressive...very very different from our next door neighboring state. 

This is my land, this is where I belong, I am really proud of it."

PATHIAN BENG

Chang thlan: I Samuela 8:21

"Tin, Samuela chuan mipuite thusawi zawng zawng chu a hria a, LALPA bengah chuan a thun leh chhawng a."

Tuman mitin Pathian la hmu lo mah ila, Pathian hian beng chu a nei ve ngei niawmin he chang atang hian a hriat theih a. Bible lehlin dan hrang hrang a awm a, hei hi kan Mizo Bible lehlin hlui pawl a ni. Mihring piang pangngai chuan beng pahnih kan nei a, Pathian hian beng engzat chiah nge  a neih hriat a ni lo. Mihringin beng pahnih kan neih chhan hi tam tak hrilhfiah dan chuan, "Kan ngaithla tam ang a, tlem te chauh kan sawi tur a ni, tihna a ni," an ti a, a dik hmel ngawt mai. Jakoba 1: 21 ah chuan "...mi tinin ngaithlak chuh sela, thusawi chuh lo sela," a lo ti thlap reng a ni.

Pathianin min ngaithla:

Kan tawngtai hian Pathian hian min ngaithla lo riauva hriat chang a awm thin a. Mahse min ngaithla a nih tih hi pawm a tha a ni. Kan dil ang ang chuan min chhang zung zung hauh lo ang a, mahse kan sawi reng reng hi chu a lo ngaithla em em a, kan sawi loh pawhin kan rilru te hi a ngaithla thei a ni. Tun lai khawvelah chuan beng tha lo tan hearing aid te a awm a, Pathian hian hearing aid te hi mamawh ve tak maw? Tunlai lehzualah phei hi chuan cell phone ngaithlak nan bluetooth te a awm a, wire tel lovin phone a  biak zeih zeih theih a. Hre ngai lo tan phei chuan mahni phun mual mual emaw tih mai awl an ni ta! Pathian bluetooth hi a tha khawp a, ral hla deuh ami pawh a man tha em em vek mai a, kan dilna te kan tawngtaina te a ngaithla em em vek a ni. Sam 34: 15 ah chuan "......A beng chuan an au hre turin a ngaithla reng thin." a ti a ni. A thlamuanthlak asin!

Tawngkam thiam te, zei tak leh nal taka tawngtai thiam te chauh hi Pathianin a ngaithla a ni lo. A enga pawh hi a ngaithla a, tawngtai thiam lo te, chham tur hre miah lo te, ngaihtuahna nei miah lo te, pawh a ngaithla vek mai. Pathian hi mi zei te leh mi tawngkam thiamte chauhvin be pawp theiin an harstna te thlen thei bik dawn se, a fair lo ngawt ang, Mitin ta tur chanchintha kan tih hi a fail chiang ngawtin ka ring. Rome 8: 26 ah chuan "..Engtia tawngtai tur nge hre lo mah ila, thlarau chuan min tawngtaisak thin a." a la ti leh ta zel a. Hemi awmzia chu thu chham tur hre miah lo mah ila, kan aiawhin thlarauin min tawngtaisak thin tihna tluk a ni. Chuvang chuan kan thinlung, kan hmui leh aw ri mai ni lovin kan thinlung lam daih Pathian hian a lo en a, kan dil duh te chuan kan tawng rik hma pawhin chiang takin a hnen a thleng thin a lo ni.

Kan Bible chang thlanah hian han let leh ta ila. Israel te hotupa, an Zawlnei leh roreltu Samuela chu a lo tar ta a. A fapa te pahnih lah corruption ah fihlim lovin an laktlak loh riau mai si a. Tichuan Israel fate chuan an vel hnam dang lal nei hote an han thlir vel a, Lal neih ve an duh ta a, lal siamsak turin Samuela an nawr ta a ni. Samuela chuan mipui hnen atanga  thu dawn apiang Pathian bengah a chhung lut ta zel a ni.

Hetia lal an dil ta mai hi Samuela ngaih dan a ni lo khawp mai a, Pathian hnenah a tawngtai ta a. Pathian chu Samuela ai mah mahin a lo ling ta zawk a. Amah Pathian chu LAL atana an duh ta lo anga ngaiin LALPA chu a lunghnur tak zet a ni. Amaherawhchu; heti khawpa Pathian a lungni lo chung hian, mipui ho lungrual taka tawngtaina chu a  ngaithla chang a ni lo, an dilna chu a  tihhlawhtlinsak zui hial! Chuti khawpa lainatna ngah Pathian chu a ni kan Pathian hi  a ni a, kan duhna te kan mamawh te a hre em em a, kan dil phawt chuan a beng hi a thleng em em a ni. Isarel te thil dil a lung nih loh zawng pawh a tihhlawhtlinsak a, keini Ama ram zau nana diltu ho phei hi chuan kan dil hi hmu tawhah inngaih hmiah a him ber zawk!

Mite tawngtaina pawh a ngaihthla:

Mi tam tak chuan, "Ka Pathian" tih te, "Min ngaihsak bik" " Min hmangaih bik" tih te kan ching thin a. Mi mal taka kan la lut thei hi a ropui em em a ni. Mahse kan hriat reng ngai chu, "Pathian hian keini chang ni lovin, midangte tawngtaina pawh a ngaihthla ve tho," tih hi kan hriat a va pawimawh em! Exodus 22: 23 ah chuan Pathian chuan, '........min rawn auh phawt chuan, an mi auhna aw chu ka lo ngaithla ngei ang.." a ti luah mai. Mihring hi kan sual khawp mai a, engmah ni lo pawh hian mahni aia la hniam leh la chenbeh ve leh zawk te hi eng emaw ti taka hmuhsit emaw, tihduhdah emaw, a thawka aphita namnul emaw, uan khum emaw, chapo khum emaw kan ching duh khawp. Mahse chu chu kan Pathian duh zawng a ni hauh lo. Sorkarah te pawh kan hria, a hotu zawkin a hnuaia mi rilru na taka a siam chang a awm thin. Mi rilru na chuan Pathian an au thin a, chu chu Pathian hian chhan a inpeisa at mai a ni. Ringtu kan ni a, kan tawngtaina Pathianin a ngaithla kan ti mek lai hian, kan tihduhdah a te tawngtaina pawh chhan Pathianin a lo GUARANTEE daih tawh tih hi kan hriat a tha hle. Thawh hlawh inpek fumfe loh te hi a hlauhawm asin. America ah ngat phei chuan hna thawh hlawh inpek that loh hi sual lian tak a ni a, an ngai serious em em. Jakoba 5: 4 ah chuan "..inhlawhfa te hlawh in pek duh loh kha, mipui te au thawm LALPA bengah a lo lut  ta.." a ti a, a dawt leh hi huphurhawm tak a ni tawh, engtin chiah nge hlawh pe duh lotute chungah Lalpa hi a lo chet tak ang le?

Pathian thu hi a taka hman a va har dawn em! Exodus 23: 9 ah chuan, "Hnam dang in hnehchhiah tur a ni lo, nangni pawh Aigupa ramah khan hnam dang in lo nih tawh avangin.." tih a inziak a. Mizo te hi hnam dang hmuhsit ching, hnam tenau zawk ngai thei lo. Hnam lian pawh an ngo loh chuan engah mah ngai lo hnam kan ni a. Kan racist em em mai a. Mahse Pathian chuan hnam dang ho thlavang a hauh hmiah mai. A dikna rengah chuan eng vang mahin kut kan thlak mai mai te a thiang mawlh lo. Hnam dang te hi an tawngtai ve thei tho va, kan Pathian hian an tawngtaina te hi a chhang ve tho a ni tih kan hriat a va hun tak em!

A thikthu a chhia:

Pathianin min hmangaih a, kan tuar ai zawng zawng a tuar a, chatuana boral tur min chhandam a. Chhandam mai ni lovin fa nihna min pe a. I Johana 2: 1 ah chuan, " Ngai teh u, Pain min hmangaihna chu a va nasa em!Pathian faahte min vuah tak hi," a ti a ni. Tichuan a khawngaihna azarah ro luahtu pawh kan lo ni ta a. A va ropui em! He chhandamna leh fa nihna dinhmun hi erawh kan hriat fuh a pawimawh em em mai. Fa kan lo nih tawh chuan fa ang a kan nun a pawimawh a, fate anga min treat a ngaih a vangin kan Pathian hi kan lakah a thikthu a chhe lo thei lo tih hriat a tul. Aman min hmangaih a, kan tan a tih natsat zawh poh leh, kan tawngtaina mawl te te te a chhan nasat zawh poh leh kan Pathian hian kan lakah phut a nei sang lo thei lova, kan lakah a thikthu a chhe tawlh tawlh lo thei lo.

Mika 6: 8 ah chuan "Aw mihring tha chu a entir tawh che a ni: LALPAN a phut che chu eng nge ni?" tiin a zawt a, a dawtah chhanna pawh a pe nghal a.

A chhanna chu:

1. Dik taka tih
2. Khawngaihna ngainat
3. Pathian nena thuhnuairawlh taka len dun, tih te a ni.

Ni tina Pathian nena lengdun tur chuan engkim hi dik taka tih a ngai. Khawngaihna ngah mi nih a ngai tih hriat a tul. Pathian nena ni tin  kan len dun theih chuan Samuela angin PATHIAN BENGAH kan mamawh chang ni lo, mite mamawh pawh englai pawhin kan chhung thei ang a. Khawvel mite laka kan vuivaina te, kan lawmthu te, kan vei zawng te, kan ngaihdan te nen lam kan duh duh Pathian bengah ngei kan thun thei tawh ang. Amen.

ZUALKOVA TLAN

Bible Chang thlan  Matthaia 14:12

"Tin, zirtirte chuan a ruang chu an va hlawm a, an phum a; tin, Isua an va hrilh a."

Mi an thi a, an thih thu midang leh an chhung khat laina te kan va hrilh hian ZUALKOVA TLAN kan ni thin a. Tun hma chuan tlangval te hna a ni thin. Zan kan tlaivar a, zing taka zual ko turin kan kal thin. A chang chuan zualkona a hla thei hle a, khaw dang daihah te a ni thin a, a chang chuan a zan a zana tlan ngai te a ni thin. Zualkova tlan te an hah thei hle a, kawng lakah chawlh theih a ni lova hmanhmawh taka kal thuai thuai a ngai thin. Zualkova tlan te chuan duat pawh an hlawh a, fak pawh an fakawm a, Mizo tlawmngaihna hmingtha zianga chhiar tel a ni ngat mai.

Tun laiah erawh chuan telephone te a lo awm ta a, hah taka kal a ngai ta meuh lo. Awlsam takin chhiat tawh thu a puanzar zung zung theih ta a. Hmasawnna avangin tlangvalte an hahdam ve ta deuh. A lawmawm khawp mai.

Isua pawh hian lu a sun ve fo niin a lang. A chunga Bible chnag kan tarlanah hian Isua chuan a unaupa Johana thih thu a lo hre ve lawk lova. Johana chu rawng takin Heroda'n a lu tansak a. Johna zirtirte chuan Johana ruang chu an hlawm a, an phum a, Isua pawh an rawn hrilh ve thuai a ni.

Kan chhungte an han thih hian kan thlabarin kan mang thei hle thin a, rilru mumal put a har thin khawp mai. Lusun tam tak chuan enge an tih a, engnge tih tur pawh an hre lo va. A then an tap nghek nghek thei mai, lusun thenkhat chu a sarhu laia tap mai thei lo, tah nachang pawh hre lo te an tam mai. Rilru a bing mup tlangpuia, ngaihtuahna tawi tuk a, sawi tur te, tih tur te ber pawh a hriat hleih theih thin loh. Hetih lai karah hian mi fel thenkhat erawh chu an rilru a fim ran a, a tul ang ang an rilru ah a indawtin a awm zung zung bawk thin.

Kan mangan viau te, kan thlabar viau te hian min hmangaihtu, min hnem theitu, kan thlamuanpui ngei tur kan ngaihtuah chhuak hmasa duh khawp mai a. Naupangte chuan, "Awi ka nu," an ti thuai a, an nu te an lam chung chung thin. Nute chu an thlamuanpui a, mahni in lam hawin "Ka nu, ka nu" tiin naupang tam zawk hi chu an tap haw rawng rawng thin. Then khat chuan Kohhran Upa te, YMA hruaitute, thenawm pa te, Sorkar mi liante, kan thian rinngam fal bik te, kan mi thlamuanpui zawng kan hre chhuak hmasa ber thin.

Johana zirtirte pawh hian an pu ber an han chan khan  mi dang hnena zualkova an kal kan hre hran lova, an thlamuanpui bakah an pu chhungte ISUA hnenah an rawn zualko thuai mai a. Hei hi an tih tur tak pawh a ni a, keini pawhin kan tih tur tak, kan hriat reng tur a ni. Isua hnenah kan zualko hmasa ber thin tur a ni a, ani chu min hnem theitu tak, min siamtu, min neitu a nih avangin kan nuna thil thleng lianah kan inrawlhtir thuai zel tur a ni.

A thuhrimah Isua chu kan pa a ni a, head of the house a ni a. Engkim ti thei a ni a, engkim hre thei leh kan koh phawt chuan kan engkima inrawlh duh a ni. Ani hnena zualko hi awlsam pawh a awlsam ber mai, khawi mah kal buai lovin a tih nghal mai theih si a. Tawngtaina in kan zualko thei a, a awlsamin a hahdam em em a ni.

Tawngtaina hmanga Isua hnena kan chhiat tawh thu emaw kan mangan thu emaw hrilh convenient zia hi ka ngaihtuah mai mai thin a.

1. Khawvel lal te angin Amah Isua be pawp tur hian appointment siam lawk pawh a ngai lo. Kan duh huna huna, regular takin emaw kan phur chang changin emaw kan be mai thei a, min chhang duh mai bawk si a.

2. Khawvel lalte angin Amah be tur hian thuam hnaw tha leh mawi pawh a ngai lo. Bawr chhawr ve te te pawh hian an duh huna hunah Isua hi an be thei mai a. Khawsak harsa ve te te te hian an duh hun hunah an manganna te an thlen keuh keuh thei mai a.

3. Telephone number sei tak tak hriat reng ngai ang kha Isuan a nei ve lo va, eng phone number mah a ngai ve lo. Chuvang chuan mi mawl ve zawk te te tan pawh eng number mah han memorise a ngai lova, thuhma leh thupha mawi tak han tlak duah pawh a ngai lo. Kan nihna ang tawk te te hian a biak theih mai!

4. Isua be tur hian signal neih that pawh a ngai kher lo, khawi hmun atang pawhin a biak theih a, khawpui ber atang  leh thingtlang kil khawr ber atang pawhin a biak theih a. Line lost te, line engage te, call drop te, battery down te a awm ve tak tak lo. Kan biak mek laia mi dangin an lo be ve a nih pawhin, "Lo hold lawk rawh aw" a ti ve kher lo, min hold-tir ngai lo va, kan sawi duh zawng zawng kan sawi zawh hma chuan min titawp ngai hek lo.

5. Ram changkangah chuan company lian be tur hian mihring an indaih loh vangte pawh a ni ang, an number han dial ila, mihring ni lovin khawl hlirin min chhang thin a, kan thil duh zawng a sawi hleih theih loh chang a tam mai. Isua biak chuan chutiang chu a awm ve lova, englai pawhin Amah ngei a biak theih a, mi dang min chhantir ve ngai lo.

6. Officer lal deuh then khat chuan an mahni be thin regular deuh te hi an ning thin a. Tin, keini mimawl zawk te pawh hian tute emaw an mahni mil tawk thu ho te te kan bual sawi sawi mai hi kan ning mai thin. Kan Lal Isua chu chutiang a ni ve lova, Amah be tam tute a ning lo chang ni lovin; a ngaina zawk a, Amah mamawhtute a hel hret hret ve lo mai ni lovin, Amah tel lova nung thei lo te  a lawm zawk a. Amah be tura kal tam te tan inthlahrunna tur a awm lo, a ning lo chang a ni lova, a lawm zawk mah si!

7. Vanneih thil thuah khawvel mi liante hi be thei dawn pawh ni ila, hun rei min pe thei lo hrim hrim a. Kan sawi tur a ropui viau loh phei chuan biakna chance kan hmu pha lo hrim hrim. Isua erawh chutiang chu a ni ve leh lo pek a! Amah kan biak peih chhung chu min ngaithla peih a, kan sawi a ropui leh ropui loh lam a ngaihtuah lo va, kan rilru a en a, kan thinglung a hmu a, a hnenah kan duh ang ang sawi ila,  nileng pawhin be mah ila, min hnar lo va; kan biak peih chhung chu Ani chuan hun a nei a ni!

8. Lawmawm em em chu Isua be tura in log in kual vel ngai kher lo te hi maw le! Isua be tur chuan user name te, password te engmah neih a ngai lo va,  chhin chhiah kar pawh a ngai lo. Tun lai khawvela in log in ngai tam ta lutuk hi a buai thlak teh mai asin. Kei mai pawh hian thil hrang hrangah password sawm chuang ka neih a ngai a, a inang ka hmang teuh chung pawhin. Kan Lal Isuan Amah be tura in log in min phut lo te hi lawmawm tak a ni!

Chuvangin unau duh tak, kan Pathianin Amah be tura awlsam tak mai a, tawngtaina te a lo pawm mai hi chu vanneithlak tak a ni. Hei aia complicate chu ni se, kan unau tam tak te tan hian a va harsa leh zual dawn em! Mawl takin, awlsam takin Amah kan dawr thei a, a hnenah kan zualko thei mai hi Amah Pathian hmangaihna leh lainatna a ni, kan that leh fel vang a ni lo ve. Khawvel chu lo changkang zelin electronic thil thar lo chhuak zel mahse, Amah kan biak dan leh A hnena kan zualko theih dan chu a pangngai reng fo ang a, hman atanga  hman tawh, tangkai em em vawiin thlenga la tangkai TAWNGTAINA hi chatuanin awm zel rawh se ...Amen.

SAM THUHMAHRUAI....

Vawiin( January 27 2013) khan Sunday sikul ka khaikhawm ve a, Mizoram Presbyterian ang thovin SAM kan zir tan a. Kan tan tlai avangin Thuhmahruai 1&2 chauh kan zir a, Pathianni vawi thum laiin a nih tur aiin kan tlai tawh a, khaikhawm thiam pawh a har khawp. Zirlai 2 kha vai phek chhiara phek 22 lai mai a ni a, chu chu min 10 vel chhunga sawi zawh chu har tak a ni, mahse engtin tin emaw kan nawr liam ta hram a. A ngaithlatute khan fiah an ti ngut ang emaw. Vawiin kan sawi tlangpui chu hengte hi an ni.

1. Isua pian hma kum 300 vel khan SAM bu hi an lo rem fel tawh a.
2. Sam hi Juda hla phuah thiam te hla dah khawmna a ni ber a.
3. Sam bu atang hian Isua pian hma Juda te Pathian thu lak leh ngaihdan tam tak a hriat theih a.
4.Sam bu rem khawm hma daih pawh hian mi tam takin Pathian fakna hla an lo phuah tawh a.
5.Thuthlung hlui hmun thuma then hmun khat lai hi hla thu hmanga ziak a ni a.
6.Sam bu hi bu 5 ah an lo then a, hetiang then chhan hi sawi fak a har a, mahse Mosian Juda te dan bu 5 a pe angin Davidan Juda te Sam bu 5 a pe ve a ni tih hi rin dan tlang lawn tak a ni.
7.Sam bu ah hian fakna hla sak mi leh hlachham mi te, tawngtaina te 150 lai a awm a.
8. Sam bu hi hla phuah thiamte hla phuah kum 800 chhunga mi lakkhawm a ni a.
9.Sam buah hian hla phuahtu langsar zual mi 7 an awm a: 
          Davida hla 73, 
          Asapha hla 12; 
          Kora fate 11; 
          Solomoma hla 2; 
          Mosia hla 1; 
          Hemana hla 1 leh 
          Ethana hla 1 te an ni a.
10. Isua khan Sam bu hi chhhiar nasa in a hre hneh hle a, a nun a kaihruai nasa hle tih a tawng kam chhuak atangin a hriat theih a. Entirnan, Kros lera a awm laia a tawngkam, "Ka Pathian ka Pathian engah nge min kalsan" tih te, "I kutah ka thlarau ka kawltir e," tih te hi Sam bu a mi a ngai ngai a lak chhuah Isuan a sawi chhawn te an ni.

Chuvangin kan zui leh entawn tur Isua meuh pawhin Sam bu a ngaisang a, a chham chhuak a, tawng kau chheh berah a hmang a nih chuan keini a hnung zuitute hian Sam bu hi tih tak zetin kan zir ve thei dawn lawm ni?..tiin kan zir.

 KA KRISMAS RILRU

Kumin kum 2012 Krismas laia ka rilru a thu lo lut ve mai mai chu chu hei hi a ni. 

Miten an sawi fo thin ang leh Bible ziak ang ngeiin nau piang Isua hi mi tin tan a ni ngei a. Mi lian leh sang ber atanga mi tlawm ber thleng huapin Lal a lo piang a. Khawchhak atanga LAL THAR chibai buk tura lo kalte atang hian, Mifing leh mi lian deuh te chungah chuan ril tak, chhut neuh neuh, zir chet chet, chhut vang vang ngaiin a pian thu a inpuang tih kan hmu thei a. Chutih laiin mi te leh mawl deuh, chhut thui ve vak thiam lo te hnenah chuan a hai a hai rual loh, a hmuha han hmuh thelh rual loh turin a pian thu a inpuang tih Berampute hnena a inpuan dan tang hian kan hmu leh thei a. Chuvang chuan fing nia kan inngai a nih chuan Isua Lalzia te, a pianzia te, a takzia te hi kan finna hmang pawha chhui chhuah theih turin Pathianin a duang chhuak tih a chiangin ka hria. 

Amah chibai buk tur pawh hian, milian leh mi fing, nei nung deuh te chuan an panna pawh a hla tham a, kal vang vang ngai a ni. Mi mawl leh mi te te ho tan erawh chuan A inchhawp hnai a, nasa lutuk a kal buai ngai lo, hla lo te a a piang a, an pan phak ve mai turah a mah leh amah a inchhawp hnai a, Berampute tan harsatna a tam lo tih kan hmu. Chuvangin a niang Krismas vuak vetah hian nei nung leh tlema khawsa thei ten midang an kep thin ni. Chuvang chuan alawm hausa zawk ten hau tak zawka Krismas an hman fo thin le..

Tlawm taka ran ina a pian avangin tu tan mah pan a inthlahrunawm loh va, mi chhe ber tan pawh timna tur awm hauh lo tur khawpa tlawmin a lo piang a ni. Ran ina a piang te hi lainat hle thin mah ila, hei aia hmun ropui chuan lo piang se keini mi chhe ho tan chuan chibai buk tura kal ve ngawt a titawm thei mai lawng maw? Kan pan ve ngamna tur tawkah Pathianin Isua a lo piantir hi Pathian remruat fing, fel leh ropui a tling a ni.

Ran inah ni lo, tute inah lo piang ta se, chu a pianna hmun chu tlawm em em pawh ni teh reng mahse, mihringa ina a pian miau chuan, kan mihring rilru en hian, tute tan emaw a pianna in kha tlawh chakawm loh a lo ni thei ang a. Tute emaw chuan, "Hemi te hi chu ka ei lo, an ina piang pawh hi ka hmu peih lo" te emaw lo ti ta se, mi tin tan a piang lo emaw tih mai tur a lo ni dawn ta a ni. Heti taka 'in-ei lohna ' ramah hi chuan thil mak a ni hauh lo ang!

A... anih loh pawhin, apianna chhung te kha mi fel leh tute pawhin an tlawh pawh ngam leh inhawng tak pawh ni se, mihring ve tho an nih avangin tawng sual hun an nei fo thei ang. "Isua te chu kan ina piang alawm" an tih fo va an intihtheih bik riau emaw an intitatu viau bik chuan thenawm khawvengte tan a nuam dawn em ni? A pianna in kha dawt heh tak chhungkua emaw, ba ngaihsak lo deuh chhungkua emaw, an tlahawlh deuh chhungkua emaw, inchei uar hlur mai emaw, corrupt deuh riau mai chhungkua emaw, inhau bur bur thin chhungkua emaw te lo ni ta phei se chuan, Isua nen inchhunna engmah pawh nei lo mahse tu tu te emaw tan chuan Isua hi phur taka chibai buk a harsat phah thei ang. Chuvang chuan Pathianin rem hre taka ran in tlawma a piantir te ringawt pawh hi lawm tham asin!

Chuvang chuan, kan sual tlan tura a lo piang a lawmawm em em, a lo pian dan zawng zawng chhut hian a lawmawm tluan parh a, a chhut thiam thiamin an chhut lawmawm thiam a, a chhut thiam lo deuh tan pawh ropui tak, lawmawm takin kan rilru mil tawk ang, kan thinlung tlin tawka sanga lawmawmin a lo piang a ni. Heng avang hian Krismas hi a ropui a, nasa taka lawm tlak a ni.

KA TUNLAI BORUAK...

Buai nen, that chhiat nen, khaw vawt nen; sawi duh chuan chhuanlam tur a tam thei khawp mai. Ka blog pawh khawhar takin ka hnutchhiah rei ta hle a. Han thai awm leh han  chhuah awm ka hre lo pawh a ni hran lo. Thu fahrah te te leh milem dawrawm te te chu ka nei nual a, mahse ka che chang lo a nih hi.

Hman ni khan ka han tum ngial a, thalak nalh tak tak dah ka tum a, mahse ka blog hian min phalsak ta hauh lo mai a. Thalak ka dah theihna free kha a lo zo tawh a, a man chawi a lo ngai dawn ta ni awm takin min hrilhfiah a. Milem tel lo ngawt chu ka ngaih dan a ni meuh lova, chuvang chuan that chhiat chhuan lamah ka blog lam ka hlamchhiah phah ta a ni. Mite hian engtin nge an tih aw? ka ti a. Kei aiin thil an post tam si a, thlalak pawh an dah tam si a, a man an chawi zar zar em ni le aw..te ka ti ta mai mai a. A man chawi ralah chuan thalatin $ 6 emaw $ 8 emaw chawi a ngai dawn a, hei hi mi te tih phung reng em ni lo ni le? Man chawi lem lova duh ang ang thlalak kan lo post ve mai mai kha a lo nuam hle mai......A hria chuan min han chhang se ka lawm ngawt ang.

Chutia ka sawi lai mek chuan..tun laia ka rilru luah em em tu pakhat chu hun kal chakzia leh, Mizo in 'pachhe kum tiam' an tih ang deuhvin, hun liam duak duak mahse eng kan nih theih si loh zia ka ngaihtuah hian ka thaw te a ipik a. Pathian zarah dam takin zing kan tho va, a lawmawm em em a, hna kan thawk mawlh mawlh a, kan mu a, rei lo teah zing dang kan tho leh mai a. Tawngthu chhe lo vah, zing leh zing te hi a lo va inhnaih ta em em ve aw!! ka ti rum rum mai.

Kum a lo tam telh telh a, kan ngaihtuahna a fim tulh tulh a. Naupan lai deuh chuan "Kum engzat nge ka nih tawh?" tih kan ngaihtuah ber a. Mahse kum a lo tam tawh chuan khalam kha kan ngaihtuah tawh lo. Zep hauh lovin sawi ta phawng phawng ila; kan lo upat deuh hnu hi chuan kum engzat nge ka nih tawh tih lam ni lo vin, "Kum engzat nge he khawvelah hian ka la neih?" tih lam rilru in a thlir tlat ta mai!!

Hei hi mi tam tak pawh an nih ka ring. He ngaihtuahna hian a tha zawngin kan nunah awmzia nei se ka duh a, thil phal thu hlaah te, huam hap loh thu hlaah te, mi dang tana ngilneih thu hlaah te, mahni hmasial lo taka mahni aia mi dang dah pawimawh zawk thu hlaah te, nun ngil leh tluang neih hrim hrim thu ah te, mi chhiatna lam ni lova mi thatna lam hmuhsak thiam thu ah te, engkim a kawi leh harsa zawng ni lova, a ngil leh herrem thei tur zawnga thlir thiam zawk chungchangah te, ngiau nger lo  mai ni lo, tu tan pawh nel awm leh thlamuanpuiawm zawnga nun chung changah te awmzia nei se zawng khawvel hi hei aia nuam zawk hi chuan a chhuak ngei ang le!!

SAWNA leh FOOTBALL

Kan naupan deuh lai chuan vai ram kal thang ho chuan chawa limbu tui sawr hi an ngaina  duh khawp mai a. Ser tui an han sawr a, tui ti takin chaw an ei ta thin a. Miin chawa limbu tui sawr  a duh viau chuan,"Vai ram kal thang" a ni tih kan hre mai a. Vai ram kal ve mang lo tan chuan lo ngainat ve vak ngam chi a ni lo!

Kan han tleirawl chhova, inti vai ram kal em emin limbu tui sawr kan han duh ve tan a. Mahse vai ram awm thang ho chuan Cricket min ngaihsansan leh ta daih a! Cricket chu eng ang nge pawh kan hre ve si lo va, mahse vai ram kal thang, awm thang ho tawh phawt chuan an ngaina zel si! Buai thlak!!

Cricket chu kan han hre ve nel nual tan a, tuan tulna avangin USA lamah kan pem ta daih a. USA ah chuan cricket an lo hre ve tawh lova, an mahni thiam zawng football an tih ve mai, keiniin 'American Football' kan tihsak kher kher hi a lo lar em em khawp mai a. Football larzia hi ka tehkhin thu thiamin a teh phak  lo, "An atchilh' mai hi a ni lo va, "An ruihchilh" nge ni,  "An khurbinpui" a ni ber lawm ni aw ka ti thin.

Kum 10 chuang awm hnu pawhin keini puitlin hnua chhuk ho hi chuan kan la tuipui thiam chuang lo va. Naupan deuh laia chhuk te erawh chuan an tuipui thiam deuh mai. Keini ang duang chuan an khelh dan leh point score dan pawh kan la hre thiam  tha thum lova, ruih chilh chu la hla tak a ni.

Football chu High School atang hian urhsun takin an khel tan a. High School hian team hnih, Junior Varsity team leh Varsity team an nei tlangpui a. A ram pumin an sport ngaihlut ber a nih avangin High School team atana an insenso dan leh an inpuahchah dan pawh hi pui tham leh ngaihawm tham a tling a. High School changtlung leh lar apiangin team an nei tha elo maw tih tur a ni. High School ka hmuh ve tawh chin hi chuan football khelmual stadium tha tawk tak an nei theuh ngei ngei a. Chutah chuan High School dang te nen Home team leh Visitor/Guest team angin an inkhel thin. JV team leh Varsity team te an khel thin. Football bikah chuan Zirtawp zan hi High School chan, Inrinni zan hi College chan, Pathianni hi Pro ho chan a ni.

Professional player ho nasa taka ram puma an lar ang hian, College player te chu an College leh University ah te an lar em em a. Chutiang tho chuan High School team ami te chu an Sikul vela chuan chang lailum vet vet tak an ni. Chung team-a tel te chu ngaihsan leh en rawn an hlawh em em a, duh pawh an induh, tih pawh an intithei! An thaw hi a veng hliah hliah mai a ni.

Kumin hian ka fapa SAWNA pawl sawm zirlai chuan football khel turin  team ah a intatlut ve a. Rim takin an trianing a. Nitin an practise a, inrinni phei chuan zing dar 6 vel atangin ni leng deuh thawin an inzir thin. Hetiang training naah hian kal loh an hlau thei em em mai a, dam lo chung chung pawhin an kal tho tho a. An practise hi chu engmah an indaltir thei lo a ni ber.  Chuti khawp chuan infiamna lamah duh thawh mahse lehkha an thiam tel tho loh chuan team-ah awm a theih der loh. An ziritrtute duh dan leh rules zam ang ang zawm a ngai a; zawm loh chuan an mahni an inban a ni mai a, chu chu an hlau em em a ni. An sikul ah an tlang tla a, an lar a, team a tel loh hi an hlau zek zek a ni ber mai. 

An zir dan a hautakin invawnna pawh a khawng tha hle a, tlai te, thulh te chu thil awm thiang lo ang a ni. Chuvang chuan he thil hian mahni inthununna zia a zirtir tha hle a, puitlin leh hmasawnna kawngah a tangkai em em a ni. An tih tirh lam khan a ke a rawn titiak a, vung bur chungin, zakdawh tiang nen nitin an practise naah a kal ve ziah tho va, thlah ziah a ngai leh nghal a bauithlak duh hle. "Kei lo hi Mizo khel ve an awm em?" tiin min zawt sek leh nghal a, ka chhang thei lo leh nghal.

Rei tawk an zir hnu chuan High School dang nen an inkhel ta thin a. Hman ni  khan Gaithersburg HS JV team nen an inkhel a. Kan fate team chu an chak a, an lawm ngang mai. Chumi ni photo tlem chu han thlir ila:

Seneca Valley HS hi kan fate sikul chu a ni. Home field ah khelh a ni.

Seneca chu a hring, Gaithersburg chu a var.

An team ah hian mi 30 vel an awm. Mahse mi 11 in an khel thung.

Inkhelh  lai mek..

Sawna chuan NOSE GUARD a khel a # 21  a ni.

Sawna chu lehlam pawlin kar thluk a tum mek...

An form man pawh hi a tlawm lo hle.

Referee kawr rang hate hi mi 3 an ni..

Anu leh a u ten hla tak atangin an lo thlir.

Inkhelh hahthlak tak a ni.

Helmet khum loin.

Len, tha ngah leh chak, thiam leh chhel a ngai.

An inkhelh dan hre thiam tan chuan hmuhnawm tak a ni ve.

Kawr var lam pawh an tang hle.

MIDUM KA TAWNG!

Thawhlehni hi  hna atanga ka chawlhni a ni a. A remchan phawt chuan tennis ka khel thin. A vawh viau chuan indoor kan kal a, a vawh viau loh chuan outdoor kan khel tlang pui a. Indoor a khelh chu nuam zawk fe mahse a man a to avang leh outdoor chu man chawi lova khelh a nih vangin kan uar hram hram zawk a.

Kum a lo upat zel hian exer lak nan eng emaw tal khelh ngaiin ka hria a. Hriselna vawn that nan leh hna tluang taka kan thawh theihna atan a tul ka ti thin. Inkhelh nana hun tam ang reng tak ka hmang thin hi a chang chuan ka inthlahrung ve deuh thin a, mahse "Hna a pawimawh ber a, a dawtah exer lak," tiin ka intlawhkhalh  thin. Kan hrisel loh chuan hna tha takin a thawh theih loh reng a, chuvang chuan thubuluk tak sawiah chuan ka inngai chuang lo. Dam vuau vuau mah ila, kan tha a zat tlat loh chuan nun a nguai a, hna a thawh that theih loh va, nun a hlim lo thin. Chutiang ni lova nun zangkhai leh harhvang kan neih theih nan mahni tlin ang tawk tawka regu taka exer lak hi a ngai ka ti a, hlawk pawh a hlawkpuiawm ka ti thin.

Nimin October  16 2012 thawhlehni khan eng emaw hlek avangin kan pisa ah ka tennis khelhpui ber ber Mawia leh Kapa te  nen kan inhmukhawm a. Kan hman tlang bawk a, inkhelh chu kan rawt phur nasa mai a. Tichuan a khelh na hmun tur Laurel City kan kal zen zen lohna hmun kan ruat a, min lo va kalsana, kei chuan ka hman veleh ka va zawm ve leh tur a ni a. Kan inkhel kual a, kan hlim thei hle thin a. Nimin chuan ka va thlen phei ve hmain ka thiante pahnih chuan an lo khel lauh lauh a, ka va thlen phei chuan an zo ruai tawh a. Tichuan rei lo te hnuah chuan Mawia a chak ta a. Kei chuan a chak zawk chu ka tum ang a, chumi hnuah a chak lo zawk nen chuan kan inkhel leh tur a ni. Mahse Kapa chuan appoinment a neih tak thut avangin min kalsan a, a racket pakhat a theihnghilh nghe nghe a.

Mawia nen chuan kan inkhel a, Mawia chuan, "Kei pawh tlai dar 4-ah Doctor appoinment ka nei a, ka khel rei vak hman lo ang," a ti ve leh ta a. "A pawi lo i hman chen chen kan khel mai ang chu," ka ti a. Kan khel chho ta zel a. He kan khelhna hmun hi sorkar park a ni  tennis court pahnih a awm thiang a, tumah dang mi dang an awm ve lo. Kan piah hla takah chuan nunau inkawm hlim hi an awm nak nak a. Nakin hnu chuan midum tlangval chapal tawng lam bun hian kan inkhel chu pal pawn atang chuan chuan min rawn bih a. Min en ta reng mai a!

Ngaih tha lo deuh chuan kan khel zel a, midum pa lah chuan zawi zawiin min rawn nel hret hret ta mai a! A hnu deuh chuan a hung chhung a lo lut a, kan ball vuak per te chu min rawn chharsak ta hial a! "Kan chhar thei alawm, i tih a ngai lo," ka tih fo hnu pawh chuan min chhrasak ta zel mai a. Mak ka tiru ang reng khawp mai a.

Dar li a ri a Mawia chuan, "Ka kal a hun," a tia a inthlak ta sawk sawk mai a. Chutih lai tak chuan midum chuan, " Ka khel ve thiam," a rawn ti a. Mawia chuan hmanhmawh deuh hian, "Chu... a khelh thiam chu...lo khelhpui mai rawh..kha... Kapa racket kha hmang se..a mah a awm chuang lova a ui chuang nang.." a ti zung zung a. Kei chuan tih vak ngaihna hre hek lo i, hun ka la ngah ang reng si, tui lo zet chuan,"Ok lets go," kan ti a, Kapa racket chu midum pa chu ka pe a. Midum pa chu net hnaihteah a ding a, ball chu kan vaw phei a, nalh zet zet hian ka vuak dik chhung chu a lo volley dik thlap thlap ta mai a!!!

Mawia kal liam tur chuan a rawn hmu hman a, "E... a thiam a nih kha a phone number lo dil rawh.." ti vau vauv chungin a tlan liam a.

Kei chuan, "Chapal i bun a khawnge i tennis shoe?"

"Inah a awm?"

"In in a hla em? Car i nei ?"

"Car nei lo, kar thum kal ta khan Ghana atangin USA ka lo thleng ve chauh va, kan in chu a hla vak lo ke in ka leng kual thin."

"Pheikhawk chu va la rawh, ka lo nghak ang che. Racket i nei bawk em?"

"Hun i ngah em ni? Aw le... ka kal nghal... racket pawh ka nei. Tennis coach ka nia lawm." tih pahin a tlan liam ta nghal a.

Ka lo nghak reng a..tha tho zet hian minute 20 hnu vela chuan a rawn let leh a, tennis bag hlui uk khak mai hi a rawn ak a, a bag-ah chuan a airline tag pawh a la inkhai va reng a.

Tichuan kan khel ta alawm..a rawn let leh kha chu le.., "Ti hian ti rawh..ti zawk hian....ni lo.... khatin ti suh.....ti khan aw...... ti khan....." a ti ta sek mai a, kei chu ka ti deuh duk ta zawk a, a duh dan dan chuan min hrual kual ta mai a! A lo thiam ngiang mai reng a, kei mahni vuak vuak a vua chuan thiam vak hek lo i, mi chu a coach chho ta tlauh tlauh mai a. A hma darkar chanve leka ti deka min thlirtu khan a thu thuin min dah a; a duh dan danin min vir kualtir ta a nih chu..mak thei ngei.

Ka sawi duh ta ber chu..Tupawh hian thiam zawng tak an neih chuan an mahni mualah an tlang tla nghal mai thei tih te, Thiam thil nei te hi chuan zah an kai mai tih te, thiam thil eng emaw tak neih ngei hi a va tha em tih te..Mizo thalai tam tak eng vak mah thiam nei lo, tui nei lo, hmasawn tum lo, hobby nei lo, sum heh si...zuk leh hmuam duh si...te ka ngaihtuah kai a...

Tichuan, tlai tak thlengin kan khel a, ka haw dawn chuan $ 20 ka pe a, lawm takin a la a; USA a pawisa hlawh hmasak ber a nih ngei ka ring..."Min rawn phone rawh hna ka la nei lo, ka khelhpui reng thei che..helaiah hian nitin ka kal thina a, tumah inkhel ka hmu ngai lo...khelhpui i nuam si..." min tia kan inthen ta a ni.

Midum pa chuan min coach ta zawk a....

A tawpah chuan ka tluk loh a ni tih hriain ka ngaisang ta em em a....

TUZ

Q. Mizo tawngin Juice engnge?
A. Thei tui

Q. Hmm..serthlum tui sawina atan chuan a inhmeh viau va. Mahse carrot juice te hi?
A. Thlai tui.

Q. Hmm..carrot chu thlai chu a ni ngei mai a, mahse tuman thlai tui an sawi pawh ka hre ngai lo...hmm  eng pawh nise pawm phawt ang. Anih leh thei ni lo, thlai ni si lo, wheat grass juice te hi thei tui nge thlai tui nge ..engnge ni ta ang?
A. Ka hre tawh bik lo...juice tih chu 'thei tui' ti ngawta lehlin chu a dik thei chiah lo a nih chu a.

Ni reng e, 

juice tih ngawt hi chu 'thei tui' tia lehlin chi a ni thei lo. Chuvang chuan juice tih ngawt chu "tui" tiin let ila a dik bawk si lo. Tichuan, hming thar tui tih lam hnaih, juice tih lam hnaih deuh phuah ta ila...juice sawina atan chuan........."TUZ" kan ti mai em ni ang?

Entirnan, apple tuz, serthlum tuz, carrot tuz, wheat grass tuz... a rem nalh phian lawng maw!

SUNDAY MORNING

Sunday morning undoubtedly is the best time for me. There's nothing to hurry about, as our church service starts at 2 pm. Compared to other mornings, this is one you can sleep in the longest time. Therefore, it does not make any difference for children or adult, for we all look forward about this time in  a same degree. Life is rather slow, peaceful and reminiscing.

My wife would prepare breakfast for all of us. When it is finally a time to get up, coming down from second floor bedroom to the kitchen is always really inviting. The mixed aroma of  bacon, sausages, crepes and toasted bread from the kitchen heightened the appetite. And then followed by a prolonged ingestion, while discussing how our families back home in Mizoram are doing.

I am sure 20 years hence, when I look back,  this is going to be one of the time I would cherish the most.

We can watch TV  leisurely..as my son Zela does.

And I,  trying to get enough sleep to make up what I  lost  a week before.

Bible reading time..time changed, books gone;  reading Bible verses from iPhone and iPod.

Kids love reading more from 'i' stuff.

One read the verse while others follow from his/her own

Same apps and same version is downloaded for each one of us, then we can be in congruity.

HIGH HEEL LEH SUIT

Pu Malsawm Kima (Maskie),Mission Veng, Aizawl in Global Mizo Presbyterian Fellowship Facebook group ah, BIAK IN a inchei dan chung chang leh, incheina kan uluk a tul rual a, inchei dan kaihhruaina kan siam vanga inkhawm tur mang mang kan hnar theih dan te, chuvanga a ngaihtuahna kal zel te a ziak a. A tha khawp mai. Chu chuan min tiphur deuh nge ni, tichuan ka rilrua awm ve mai mai chu Thuziak hrulah tlem han ziak ve ka duh ta a ni.

Mizoram awm dan chu Presbyterian Kohhran hian kan influence thui khawp mai a. Chuvangin inthuamna lam hi chu sawi a hlawh a ngai reng a ni. Ka lo ngaihmawh ve mai mai thil pahnih te chu:

1. Hmeichhe hovin high heel, a bikin high em em heel an bun fo mai hi tih ziaawm dan a awm thei em? Thenkhat sawi dan chuan heng high heel thenkhat phei hi chu porn star ho chauh bun chi te ani a, kan hre hrang tawh mang si lo a nih hmel. Kan ram chhengchhia leh diakah hian bun hahdam lam uar hi a sual lem em ni aw ka ti..

2. Kohhran upa leh pastor te chu thu khat, KTP mipa member pangngai ve mai, kum lama pawh upa hrih lo, mahni kutkea la ding lo tak tak ten suit leh thawmhnaw tha ber ber neih kawnga rual kan han el tlat mai hi, veitu tan chuan thaw chu a ipik duh ngawt ang.

Kan awmna USA ah hi chuan incheina hi a thupui lo khawp mai a. Kum sawm dawn kan fate awm tawh hnu han an thawmhnaw manah tih tham kan la seng hauh lo. Kan faten rual an awt lutuk lo hi a lawmawm a, mahse tu fate mah hian chuti lutukin thawmhnawah rual an awt tlat lo. Thawmhnaw in mi an teh lo a ni ber mai.

Engtin nge kan sawi ang, sawitu nih pawh a zahthlak lek lek a. A veiawm ve si. KTP te hian," Kum thar atang chuan mahni hlawh chhuah chauh va thamhnaw lei," tih te hi kan inzirtir thei em. Chu chuan odd job neih ve ngaihtuahna min siam ang a, sum hlutna te, sum dik taka hman thatna te, thawhchhuah ngaihsanawmzia te, Inchei tuk mai tul lohzia te, thawmhnaw man to to neih a sawt loh zia te, a thawka phita suit leh high heel tih reng mai atthalakzia leh kan inmawi hran lohzia te min zirtir hlauh thei ang em????

MIZO KA NI EM?

Ka sawi tawh thin ka sawi leh ang, Mizo kan nih leh nih loh hriat fiah nan.

1. Mizo i nih avangin Indian i ni kher lo. Mizo ni chungin, Indian, British, Burmese, American, Iranian, Australian etc..a nih theih. Mizo ni reng chungin Mizorammi a nih loh theih tho bawk.


2. Mizorama awm leh awm lo te; India ram chhung leh pawna awm, foreign daiha awm te pawh huamin, Mizo tawng thiam em em leh thiam lutuk lo leh; thiam thak lo te pawh, Mizo ni lo, Zo hnahthlak a awm leh theih. 


3. Mizo ni lo, Vai /Sap/Khasi/Tuikuk/Chakma etc. ni chungin 'Mizorammi' a nih leh theih bawk. Mizorama piang leh sei lian te hi Mizo tawng leh culture engkimah an Mizo hle thei a, an Mizo lutuk kher lo a nih pawhin; Mizorama piang leh sei lian an nih vang ngawtin Mizo an ni thei lo.  Chung mi te leh Mizorama awm ho sawina atan Mizorammi tih hi kan phuah chhuah a ngai. Mizorammi chu automatic in Indian an ni nghal thung a ni.

4. Mizoram pawna piang leh sei lian, ram dang mi nihna nei Mizo fate chu engti kawng mahin Mizorammi an ni thei lo va, Mizo erawh an ni a, Zo pawh an ni thei bawk.

Tichuan,
Zo' hnahthlak a awm a; chu chuan Mizoram a awm zawng zawng leh, Khawvel hmun tina awm, Mizo tawng thiam em em leh thiam em em lo te, thiam miah lo te, thlahtu khat ho a huam a.

'Mizo' an awm leh a: Chu chuan Mizorama awm te, khawvel hmun tina awm te, Mizo culture vuan tlat tute, "Mizo ka ni" inti duh chin; Mizo mualpho a rilru na, Mizo hming thata lawm thin te a huam a.

'Mizorammi' an awm leh a: Chu chuan Hnam zawng zawng Mizoram mi nihna (citizenship) nei zawng zawng, Mizorama piang a sei lian, ram dang mi nihna nei chuang lo te, vai e, sap e, khasi e, tuikuk e, chakma e a huam vek a ni. A then chuan Mizo tawng an thiam em em ang a, a then chuan an pai ang; thenkhat phei chuan an hre tlem viau mai thei. 

Mizo ngei ngei pawh Mizorammi a nih loh chuan Mizorammi te hamthatna a dawng ngawt thiang lo. "Mizo dik tak alawm," kan ti a ni thei, a dik, mahse Mizorammi a nih miau loh chuan eng ang pawhin Mizo se, eng ang pawhin tawng thiam nal mahse, vote neihtir ngawt chi a ni lo. British ho khuan vun ngo zawng zawng an welcome chuang lo va, vote neihtir chu sawi loh, English an thiam em avangin tuman British nihna an chang ngawt thei lo, politic thil a ni tlat. Kan unau te chu an ni ngei ang mahse ram dang mi an ni tlat thei a ni. 

Khawvel ram thang zelah Mizorammi zawng zawng hi Mizo an ni kher lo fo tawh dawn bawk. Kan intlawh pawh tawlh tawlh ang a, kan inchim nasa tawlh tawlh ang. Mihring kan pung zel ang a, khawi lai kil kilah emaw chuan Mizo tawng thiam miah lo pawhin an lo seilian ve em em thei dawn a ni. Chu chu thikthu tih chhiat tur a ni lo va, kan len ve tawh zia hriltu a nih avangin pawm thiam a ngai a, lawm zawk hleuh theih a tha hle.


Mizo tawng pawh hi Mizo te tawng a ni ngei a, thik tur pawh a ni lo va, thik theih pawh a ni lo. Mizo tawng hman hi tlawma lak tur pawh a ni lo. He Mizo tawng hi Zo hnahthlak te zingah tawng lian ber leh hman tlanglawn ber a nih chuan a lawmawm a. Mizorammi te tawng pui ber pawh a ni reng ang, sawi thu a cheng lo. Zo hnathlak insuihkhawm kan duh luatah Mizo tawng kan neisa hi Lusei tawng bik anga chhuah thar leh a, Zohnahthlak dangte huam tel hram hram tum zawng a tawng hming neih tum hi chu hnung lam hawi chunga hmasawn tum ang deuh niin ka hria.


British an awm a, English an awm leh ang hi a ni a. English mi ni lo British dangte hian tawng dang an nei ve tho va, English hnawk tiin a hming thlak an tum sek lo. British tawng tlang lawn ber chu English a nihna an hai lo va, hman ve kha tlawmah an la ngai chuang lo. Chu English tawng chu British chauh pawhin tawng puiah an hmang lo va, American te, Canadian te, Australian te leh ram dang tam tak pawhin  an ram tawng pui berah an hmang mai. A hmangtu an tam vangin a hmangtute zawng zawng huap kim zawngin hming thlak erawh an tum kher kher lo chu a nih hi!


Tichuan han ti leh ila;

He term MIZORAMMI tih hi, American, Canadian, Australian, British, Indian etc..an tih ang deuh a ni a. Hei hi kan neih ve loh chuan tun lai hunah hian hnam inpumkhat chung changah kan inhrilhfiah thiam mawh hle ang. "Mizo a ni,  a ni lo" tih thu hlaah kan buai kan buai a, tul lovah kan inhnial vak vak ringawt thin; loh theih lohvin duh bak bakin kan inhnial hnawk fo thin niin a hriat. 

Entirnan: Tun hnaiah Mary Kom "Mizo a ni, a ni lo" tih chung changah inhnialna a tam hle. Ka ngaihdan chuan, "Mizo te chu khawiah pawh awm se chhiat ber lai leh that ber lai pawha Mizo ka ni ti ngam ngat te hi Mizo an ni," tih hi a ni. Chung mite chuan Mizo an nihna an phat lo va, sawibuai theih a ni lo. Khawiah pawh awm se Mizo community ah an tel thin a, tel lem lo an nih pawhin Mizo an nihna an phat chuang lo. Chutiang mi chu Mizoram pawn Burma ah te, Manipur ah te, Tripura,Bangladesh etc..ah te an tam mai. Mahse, mi then khat chu Mizo ni lovin ZO hnahthlak an ni thung. Heng mite chuan Mizo tawng aiin an mahni tawng an tuipui zawk a, Mizo community ni lovin an mahni community an tuipui zawk. Chungte chu ZO tih mai chi an ni. Unau vek tho kan ni. Heng kan unau ram dang mite hi Mizo an ni emaw Zo an ni emaw unau vek kan ni a, kan in pui pawh Mizoram tho a ni. Mahse.... heng Zo te Mizo te Mizoram pawna awm te hi kan unau te pawh ni raw sek sek, sorkar dan kal phung fel tak hmanga, Mizorammi nihna pek an nih hma chuan Mizorammi an ni lo va, Mizorammi te hamthatna, Mizorammi te chanvo bik hi an tan phalrai chiah ka ngai lo. Vai pawh, sap pawh, Mizo pawh, Zo pawh, Khasi pawh, ram danga awm, sorkar dan kal phung fel tak hmanga Mizorammi nihna chang tawh leh chang mek te erawh chu Mizo an ni emaw ni lo emaw Mizorammi an nih tawh chuan thliar hranna awm hauh lohva Mizoram mipui ten kan en thiam a pawimawh em em a ni. "Mizoram hi Mizo te ta chauh a ni bik tawh dawn lo va, 'Mizorammi' te ta a ni" tih hi kan pawm a hun tan  ta a ni.


Chuvangin hnam inpumkhat nan leh inunau kan thiam nan, Zo, Mizo leh Mizorammi tih te hi an nihna leh danglamna te  thliar hrang thiam ila ka duh em em a ni.


 Khai le.. MIzorammi tia kan sawi chhen chu Sap tawnga kan sawi duh chang leh kan ziah duh chang chuan "a leh n" kan belh zeuh ang a, " He/She is  Mizorammian" kan ti mai dawn zu nia!