PATHIAN BENG

Chang thlan: I Samuela 8:21

"Tin, Samuela chuan mipuite thusawi zawng zawng chu a hria a, LALPA bengah chuan a thun leh chhawng a."

Tuman mitin Pathian la hmu lo mah ila, Pathian hian beng chu a nei ve ngei niawmin he chang atang hian a hriat theih a. Bible lehlin dan hrang hrang a awm a, hei hi kan Mizo Bible lehlin hlui pawl a ni. Mihring piang pangngai chuan beng pahnih kan nei a, Pathian hian beng engzat chiah nge  a neih hriat a ni lo. Mihringin beng pahnih kan neih chhan hi tam tak hrilhfiah dan chuan, "Kan ngaithla tam ang a, tlem te chauh kan sawi tur a ni, tihna a ni," an ti a, a dik hmel ngawt mai. Jakoba 1: 21 ah chuan "...mi tinin ngaithlak chuh sela, thusawi chuh lo sela," a lo ti thlap reng a ni.

Pathianin min ngaithla:

Kan tawngtai hian Pathian hian min ngaithla lo riauva hriat chang a awm thin a. Mahse min ngaithla a nih tih hi pawm a tha a ni. Kan dil ang ang chuan min chhang zung zung hauh lo ang a, mahse kan sawi reng reng hi chu a lo ngaithla em em a, kan sawi loh pawhin kan rilru te hi a ngaithla thei a ni. Tun lai khawvelah chuan beng tha lo tan hearing aid te a awm a, Pathian hian hearing aid te hi mamawh ve tak maw? Tunlai lehzualah phei hi chuan cell phone ngaithlak nan bluetooth te a awm a, wire tel lovin phone a  biak zeih zeih theih a. Hre ngai lo tan phei chuan mahni phun mual mual emaw tih mai awl an ni ta! Pathian bluetooth hi a tha khawp a, ral hla deuh ami pawh a man tha em em vek mai a, kan dilna te kan tawngtaina te a ngaithla em em vek a ni. Sam 34: 15 ah chuan "......A beng chuan an au hre turin a ngaithla reng thin." a ti a ni. A thlamuanthlak asin!

Tawngkam thiam te, zei tak leh nal taka tawngtai thiam te chauh hi Pathianin a ngaithla a ni lo. A enga pawh hi a ngaithla a, tawngtai thiam lo te, chham tur hre miah lo te, ngaihtuahna nei miah lo te, pawh a ngaithla vek mai. Pathian hi mi zei te leh mi tawngkam thiamte chauhvin be pawp theiin an harstna te thlen thei bik dawn se, a fair lo ngawt ang, Mitin ta tur chanchintha kan tih hi a fail chiang ngawtin ka ring. Rome 8: 26 ah chuan "..Engtia tawngtai tur nge hre lo mah ila, thlarau chuan min tawngtaisak thin a." a la ti leh ta zel a. Hemi awmzia chu thu chham tur hre miah lo mah ila, kan aiawhin thlarauin min tawngtaisak thin tihna tluk a ni. Chuvang chuan kan thinlung, kan hmui leh aw ri mai ni lovin kan thinlung lam daih Pathian hian a lo en a, kan dil duh te chuan kan tawng rik hma pawhin chiang takin a hnen a thleng thin a lo ni.

Kan Bible chang thlanah hian han let leh ta ila. Israel te hotupa, an Zawlnei leh roreltu Samuela chu a lo tar ta a. A fapa te pahnih lah corruption ah fihlim lovin an laktlak loh riau mai si a. Tichuan Israel fate chuan an vel hnam dang lal nei hote an han thlir vel a, Lal neih ve an duh ta a, lal siamsak turin Samuela an nawr ta a ni. Samuela chuan mipui hnen atanga  thu dawn apiang Pathian bengah a chhung lut ta zel a ni.

Hetia lal an dil ta mai hi Samuela ngaih dan a ni lo khawp mai a, Pathian hnenah a tawngtai ta a. Pathian chu Samuela ai mah mahin a lo ling ta zawk a. Amah Pathian chu LAL atana an duh ta lo anga ngaiin LALPA chu a lunghnur tak zet a ni. Amaherawhchu; heti khawpa Pathian a lungni lo chung hian, mipui ho lungrual taka tawngtaina chu a  ngaithla chang a ni lo, an dilna chu a  tihhlawhtlinsak zui hial! Chuti khawpa lainatna ngah Pathian chu a ni kan Pathian hi  a ni a, kan duhna te kan mamawh te a hre em em a, kan dil phawt chuan a beng hi a thleng em em a ni. Isarel te thil dil a lung nih loh zawng pawh a tihhlawhtlinsak a, keini Ama ram zau nana diltu ho phei hi chuan kan dil hi hmu tawhah inngaih hmiah a him ber zawk!

Mite tawngtaina pawh a ngaihthla:

Mi tam tak chuan, "Ka Pathian" tih te, "Min ngaihsak bik" " Min hmangaih bik" tih te kan ching thin a. Mi mal taka kan la lut thei hi a ropui em em a ni. Mahse kan hriat reng ngai chu, "Pathian hian keini chang ni lovin, midangte tawngtaina pawh a ngaihthla ve tho," tih hi kan hriat a va pawimawh em! Exodus 22: 23 ah chuan Pathian chuan, '........min rawn auh phawt chuan, an mi auhna aw chu ka lo ngaithla ngei ang.." a ti luah mai. Mihring hi kan sual khawp mai a, engmah ni lo pawh hian mahni aia la hniam leh la chenbeh ve leh zawk te hi eng emaw ti taka hmuhsit emaw, tihduhdah emaw, a thawka aphita namnul emaw, uan khum emaw, chapo khum emaw kan ching duh khawp. Mahse chu chu kan Pathian duh zawng a ni hauh lo. Sorkarah te pawh kan hria, a hotu zawkin a hnuaia mi rilru na taka a siam chang a awm thin. Mi rilru na chuan Pathian an au thin a, chu chu Pathian hian chhan a inpeisa at mai a ni. Ringtu kan ni a, kan tawngtaina Pathianin a ngaithla kan ti mek lai hian, kan tihduhdah a te tawngtaina pawh chhan Pathianin a lo GUARANTEE daih tawh tih hi kan hriat a tha hle. Thawh hlawh inpek fumfe loh te hi a hlauhawm asin. America ah ngat phei chuan hna thawh hlawh inpek that loh hi sual lian tak a ni a, an ngai serious em em. Jakoba 5: 4 ah chuan "..inhlawhfa te hlawh in pek duh loh kha, mipui te au thawm LALPA bengah a lo lut  ta.." a ti a, a dawt leh hi huphurhawm tak a ni tawh, engtin chiah nge hlawh pe duh lotute chungah Lalpa hi a lo chet tak ang le?

Pathian thu hi a taka hman a va har dawn em! Exodus 23: 9 ah chuan, "Hnam dang in hnehchhiah tur a ni lo, nangni pawh Aigupa ramah khan hnam dang in lo nih tawh avangin.." tih a inziak a. Mizo te hi hnam dang hmuhsit ching, hnam tenau zawk ngai thei lo. Hnam lian pawh an ngo loh chuan engah mah ngai lo hnam kan ni a. Kan racist em em mai a. Mahse Pathian chuan hnam dang ho thlavang a hauh hmiah mai. A dikna rengah chuan eng vang mahin kut kan thlak mai mai te a thiang mawlh lo. Hnam dang te hi an tawngtai ve thei tho va, kan Pathian hian an tawngtaina te hi a chhang ve tho a ni tih kan hriat a va hun tak em!

A thikthu a chhia:

Pathianin min hmangaih a, kan tuar ai zawng zawng a tuar a, chatuana boral tur min chhandam a. Chhandam mai ni lovin fa nihna min pe a. I Johana 2: 1 ah chuan, " Ngai teh u, Pain min hmangaihna chu a va nasa em!Pathian faahte min vuah tak hi," a ti a ni. Tichuan a khawngaihna azarah ro luahtu pawh kan lo ni ta a. A va ropui em! He chhandamna leh fa nihna dinhmun hi erawh kan hriat fuh a pawimawh em em mai. Fa kan lo nih tawh chuan fa ang a kan nun a pawimawh a, fate anga min treat a ngaih a vangin kan Pathian hi kan lakah a thikthu a chhe lo thei lo tih hriat a tul. Aman min hmangaih a, kan tan a tih natsat zawh poh leh, kan tawngtaina mawl te te te a chhan nasat zawh poh leh kan Pathian hian kan lakah phut a nei sang lo thei lova, kan lakah a thikthu a chhe tawlh tawlh lo thei lo.

Mika 6: 8 ah chuan "Aw mihring tha chu a entir tawh che a ni: LALPAN a phut che chu eng nge ni?" tiin a zawt a, a dawtah chhanna pawh a pe nghal a.

A chhanna chu:

1. Dik taka tih
2. Khawngaihna ngainat
3. Pathian nena thuhnuairawlh taka len dun, tih te a ni.

Ni tina Pathian nena lengdun tur chuan engkim hi dik taka tih a ngai. Khawngaihna ngah mi nih a ngai tih hriat a tul. Pathian nena ni tin  kan len dun theih chuan Samuela angin PATHIAN BENGAH kan mamawh chang ni lo, mite mamawh pawh englai pawhin kan chhung thei ang a. Khawvel mite laka kan vuivaina te, kan lawmthu te, kan vei zawng te, kan ngaihdan te nen lam kan duh duh Pathian bengah ngei kan thun thei tawh ang. Amen.

ZUALKOVA TLAN

Bible Chang thlan  Matthaia 14:12

"Tin, zirtirte chuan a ruang chu an va hlawm a, an phum a; tin, Isua an va hrilh a."

Mi an thi a, an thih thu midang leh an chhung khat laina te kan va hrilh hian ZUALKOVA TLAN kan ni thin a. Tun hma chuan tlangval te hna a ni thin. Zan kan tlaivar a, zing taka zual ko turin kan kal thin. A chang chuan zualkona a hla thei hle a, khaw dang daihah te a ni thin a, a chang chuan a zan a zana tlan ngai te a ni thin. Zualkova tlan te an hah thei hle a, kawng lakah chawlh theih a ni lova hmanhmawh taka kal thuai thuai a ngai thin. Zualkova tlan te chuan duat pawh an hlawh a, fak pawh an fakawm a, Mizo tlawmngaihna hmingtha zianga chhiar tel a ni ngat mai.

Tun laiah erawh chuan telephone te a lo awm ta a, hah taka kal a ngai ta meuh lo. Awlsam takin chhiat tawh thu a puanzar zung zung theih ta a. Hmasawnna avangin tlangvalte an hahdam ve ta deuh. A lawmawm khawp mai.

Isua pawh hian lu a sun ve fo niin a lang. A chunga Bible chnag kan tarlanah hian Isua chuan a unaupa Johana thih thu a lo hre ve lawk lova. Johana chu rawng takin Heroda'n a lu tansak a. Johna zirtirte chuan Johana ruang chu an hlawm a, an phum a, Isua pawh an rawn hrilh ve thuai a ni.

Kan chhungte an han thih hian kan thlabarin kan mang thei hle thin a, rilru mumal put a har thin khawp mai. Lusun tam tak chuan enge an tih a, engnge tih tur pawh an hre lo va. A then an tap nghek nghek thei mai, lusun thenkhat chu a sarhu laia tap mai thei lo, tah nachang pawh hre lo te an tam mai. Rilru a bing mup tlangpuia, ngaihtuahna tawi tuk a, sawi tur te, tih tur te ber pawh a hriat hleih theih thin loh. Hetih lai karah hian mi fel thenkhat erawh chu an rilru a fim ran a, a tul ang ang an rilru ah a indawtin a awm zung zung bawk thin.

Kan mangan viau te, kan thlabar viau te hian min hmangaihtu, min hnem theitu, kan thlamuanpui ngei tur kan ngaihtuah chhuak hmasa duh khawp mai a. Naupangte chuan, "Awi ka nu," an ti thuai a, an nu te an lam chung chung thin. Nute chu an thlamuanpui a, mahni in lam hawin "Ka nu, ka nu" tiin naupang tam zawk hi chu an tap haw rawng rawng thin. Then khat chuan Kohhran Upa te, YMA hruaitute, thenawm pa te, Sorkar mi liante, kan thian rinngam fal bik te, kan mi thlamuanpui zawng kan hre chhuak hmasa ber thin.

Johana zirtirte pawh hian an pu ber an han chan khan  mi dang hnena zualkova an kal kan hre hran lova, an thlamuanpui bakah an pu chhungte ISUA hnenah an rawn zualko thuai mai a. Hei hi an tih tur tak pawh a ni a, keini pawhin kan tih tur tak, kan hriat reng tur a ni. Isua hnenah kan zualko hmasa ber thin tur a ni a, ani chu min hnem theitu tak, min siamtu, min neitu a nih avangin kan nuna thil thleng lianah kan inrawlhtir thuai zel tur a ni.

A thuhrimah Isua chu kan pa a ni a, head of the house a ni a. Engkim ti thei a ni a, engkim hre thei leh kan koh phawt chuan kan engkima inrawlh duh a ni. Ani hnena zualko hi awlsam pawh a awlsam ber mai, khawi mah kal buai lovin a tih nghal mai theih si a. Tawngtaina in kan zualko thei a, a awlsamin a hahdam em em a ni.

Tawngtaina hmanga Isua hnena kan chhiat tawh thu emaw kan mangan thu emaw hrilh convenient zia hi ka ngaihtuah mai mai thin a.

1. Khawvel lal te angin Amah Isua be pawp tur hian appointment siam lawk pawh a ngai lo. Kan duh huna huna, regular takin emaw kan phur chang changin emaw kan be mai thei a, min chhang duh mai bawk si a.

2. Khawvel lalte angin Amah be tur hian thuam hnaw tha leh mawi pawh a ngai lo. Bawr chhawr ve te te pawh hian an duh huna hunah Isua hi an be thei mai a. Khawsak harsa ve te te te hian an duh hun hunah an manganna te an thlen keuh keuh thei mai a.

3. Telephone number sei tak tak hriat reng ngai ang kha Isuan a nei ve lo va, eng phone number mah a ngai ve lo. Chuvang chuan mi mawl ve zawk te te tan pawh eng number mah han memorise a ngai lova, thuhma leh thupha mawi tak han tlak duah pawh a ngai lo. Kan nihna ang tawk te te hian a biak theih mai!

4. Isua be tur hian signal neih that pawh a ngai kher lo, khawi hmun atang pawhin a biak theih a, khawpui ber atang  leh thingtlang kil khawr ber atang pawhin a biak theih a. Line lost te, line engage te, call drop te, battery down te a awm ve tak tak lo. Kan biak mek laia mi dangin an lo be ve a nih pawhin, "Lo hold lawk rawh aw" a ti ve kher lo, min hold-tir ngai lo va, kan sawi duh zawng zawng kan sawi zawh hma chuan min titawp ngai hek lo.

5. Ram changkangah chuan company lian be tur hian mihring an indaih loh vangte pawh a ni ang, an number han dial ila, mihring ni lovin khawl hlirin min chhang thin a, kan thil duh zawng a sawi hleih theih loh chang a tam mai. Isua biak chuan chutiang chu a awm ve lova, englai pawhin Amah ngei a biak theih a, mi dang min chhantir ve ngai lo.

6. Officer lal deuh then khat chuan an mahni be thin regular deuh te hi an ning thin a. Tin, keini mimawl zawk te pawh hian tute emaw an mahni mil tawk thu ho te te kan bual sawi sawi mai hi kan ning mai thin. Kan Lal Isua chu chutiang a ni ve lova, Amah be tam tute a ning lo chang ni lovin; a ngaina zawk a, Amah mamawhtute a hel hret hret ve lo mai ni lovin, Amah tel lova nung thei lo te  a lawm zawk a. Amah be tura kal tam te tan inthlahrunna tur a awm lo, a ning lo chang a ni lova, a lawm zawk mah si!

7. Vanneih thil thuah khawvel mi liante hi be thei dawn pawh ni ila, hun rei min pe thei lo hrim hrim a. Kan sawi tur a ropui viau loh phei chuan biakna chance kan hmu pha lo hrim hrim. Isua erawh chutiang chu a ni ve leh lo pek a! Amah kan biak peih chhung chu min ngaithla peih a, kan sawi a ropui leh ropui loh lam a ngaihtuah lo va, kan rilru a en a, kan thinglung a hmu a, a hnenah kan duh ang ang sawi ila,  nileng pawhin be mah ila, min hnar lo va; kan biak peih chhung chu Ani chuan hun a nei a ni!

8. Lawmawm em em chu Isua be tura in log in kual vel ngai kher lo te hi maw le! Isua be tur chuan user name te, password te engmah neih a ngai lo va,  chhin chhiah kar pawh a ngai lo. Tun lai khawvela in log in ngai tam ta lutuk hi a buai thlak teh mai asin. Kei mai pawh hian thil hrang hrangah password sawm chuang ka neih a ngai a, a inang ka hmang teuh chung pawhin. Kan Lal Isuan Amah be tura in log in min phut lo te hi lawmawm tak a ni!

Chuvangin unau duh tak, kan Pathianin Amah be tura awlsam tak mai a, tawngtaina te a lo pawm mai hi chu vanneithlak tak a ni. Hei aia complicate chu ni se, kan unau tam tak te tan hian a va harsa leh zual dawn em! Mawl takin, awlsam takin Amah kan dawr thei a, a hnenah kan zualko thei mai hi Amah Pathian hmangaihna leh lainatna a ni, kan that leh fel vang a ni lo ve. Khawvel chu lo changkang zelin electronic thil thar lo chhuak zel mahse, Amah kan biak dan leh A hnena kan zualko theih dan chu a pangngai reng fo ang a, hman atanga  hman tawh, tangkai em em vawiin thlenga la tangkai TAWNGTAINA hi chatuanin awm zel rawh se ...Amen.