ISUA KHAWNGAIH HLAWH

Chang thlan : Marka 8:2

“Mipuiho hi tunah ni thum ka hnenah an awm tawh a, ei tur an neih loh avangin ka khawngaih em em a ni.”

Ringtute hian kan thlakhlelh ber nia ka rin thin chu, Isua hriat chian nih te, a duhsak nih te, a lainat em em nih te hi a ni mai awm e. A tuate pawh hian tlak tlum te, dusak te, tlawn te, biak that te, zah kai te, hriat hlawh te kan duh thin a. Then khat phei chuan hriat hlawh chang an duh lova, mi hre tam em em nih te an chak a, lar em em ni ang a lan an tum a; tlang tla riau nih te kan chak thin.

A chunga Bible changah hian Isuan mipuite chu a khawngaih em em thu a sawi a. A khawngaih chhan hi ni thum lai chaw ei lova a thu leh hla an ngaihthlak tawh vang a ni tih a lang nghal a. A Bible chang kan chhiar zel chuan Isuan mipui te chu a hrai puar ta a, tlai takin mipui mi 4000 lai  an in lamah a hawtir ta a ni awm tak a ni.

Isua khawngaih hlawh dan:
Isua khawngaih hlawh tur te, a thil mak tih te hmu ve tur te, leh a thiltih theihna te puarpui ve tham tur chuan Amah Isua sawi dan takah “ Mahni hrehawm pawisa lova, nitin Kross pua zui” a ngai tlat a ni( Mat 16:24) Engmah chan lo, engmah hloh lo, engmah hrehawm mah tuar lo, engmah kalsan lo chuan Isua khawngaih ni ve rual a ni lova, a thil mak tih te hmuh ve phak ani lova, a hausakna chanpui ve chi a ni lo.  Isua khawngaih mipui 4000 te hian ni thum teh meuh Isua thusawi an ngaithla a, riltam teh mahse tumah an haw ru lo a nih hmel! Mawngkham teh mahse an thu ve talh talh a, mut chhuakin ham ham  mahse Isua an kalsan phal lo.

Ni thum an ral meuh chuan Isua a che lo thei ta lo. Miin a thu an awih a, a thu leh hla an ngaih thlak peih a, an mahni nawm leh nawm loh ngaihsak lo leka Amah an zui a, an chen chilh tlat chuan Isua a che lo thei lo. Isua hi a chang chang a darkar hnih khat lek lek zuiah a che mawh khawp. Chaw ngheiin, tlaivarin, khawvel thil dang zwng zawng dah thain mi te chuan Isua an lo zui a, an lo chen chilh a. Ni khat mai ni lo, ni hnih ni thum te, kar khat te, thla mai ni lo a kum a kum te pawh miin Isua an lo zui a, tichuan Amah an hmu chiang thin. Chutah zet chuan A khawngaih an hlawh a, Amah nen  inlai chinna thuk tak an nei thin.

Kohhrana Tel ve:

Isua lainat ni tur hian mi tam tak chuan a kalkawng kan hre kher lo thei a. Engti taka mahni hrehawm pawisa lova mahni Kross pua zui tur nge pawh kan hre kher lo thei. Isuan mipui 4000 a hrai lai hi ngaihtuah ta ila. An zingah hian thalai pawh tam tak an awm ve ang a. A then chu huau huau lawm ve hrim hrim te, a then chu thathona sang tak nei chuang lo; awm chho ve laklawh te pawh an awm ang. A then te phei chu peih lo chung chunga nu leh pa te thu awih vanga awm ve te pawh an awm mahna. Amaherawchu chung zawng zawng chu Bible hian a chhui tawh lo va, mi 4000 te chuan Isua thiltih ropui an mit ngeii an hmu a, an beng ngeiin hria a, an ka ngeiin an tem ta a tih kan hria. Isua hian Amah zuitu Kohhran ho hi a khawngaih thin a, A taksa a ni bawk reng a. Kohhranah chuan mi chi hrang hrang an awm ngei e, mahse a huho hian Isua tan a hlu a, a hu ho hian Isuan a khawngaih a, a huho hian Isuan ei tur pek a duh a ni. A mi mal taka kan lo tui falna emaw; kan lo tui loh falna emaw hi a lang tawh lo va, a pawimawh ber pawh niin a lang lo. Kan nih ang ang hian Kohhran hovah hian tel ve ila, an zingah awm ve tlat ila, Kohhran ho ke pen angin pen ve zel ila, kan tlat fal loh ngat chuan a hun takah Isua khawngaihna Kohhran ho zarah kan la hlawh ve ang a, a thilmak tih te kan mitin a la hmu ve ang a, a hamthatna te pawh a tul phawt chuan kan la tem ve ngei ang. Amen.