LUSUN HNEM

March 25 2013 (Thawhtan zan) khan kan thenawm Pu Biakdika te inah nupain kan leng a. Kan len chhan chu Nl. Hlumami a riah luh vang a ni. Hlumami hian a nu Pi Sialmani a sun a, a khawhar hi kan lenpui ve e kan ti a.  Pi Sialmani chu Tahan, Burma khaw sattu fanu a ni a, Kohhran hmeichhe lama mi tangkai tak, mize tha tak nei a ni a. Kawl ram lam mite chuan an hriain an sun hle reng a ni.

Nl. Hlumami chuan a nu thih thu hi inrinni in a hre tawh a. Mahse tul eng eng emaw vangin kan leng ve lawk hman lo va. Vanneihthlak ang reng takin kan thenawm lawkah amah a rawn insawn hnai a, tichuan len vena rem chang tak kan nei ve thei ta kha a ni a. An ni hi Mizo Methodist Kohhran  mi leh sate an ni a. Kan va len zan pawh chuan Methodist Kohhran hruaitute an lo awm laih laih tawh a. Chutia kan han punkhawm tak nialah chuan hunserh tan mai an rawt ta a. Kei chu hrilhlawkna pawh awm chuang lo chuan inkhawm hruaitu atan min pawt chawp a. "Hei thuhriltu tur pastor Rodawla pawh a awm tawh tan mai ang, nangin inkhawm hruai la," an ti ta tlat mai a. Tan theih miah loh turin ka banah an kai a, min hnuk ta dawt dawt mai a. Hreh tak chungin ka hruai ta a ni.

Inkhawm ban chuan Mothodist Kohhran Upa min Pu Hruaia a lo ding chhuak a,"Naktuk zan pawh zan dar riatah bawk hun serh kan hmang leh ang a, thuhriltu atan zanina kan inkhawm hruaitu hi ni mai se," tiin a puang ta kulh mai a. Inkhawm ho lah chuan, "A tha ang," an lo ti tliar tliar a. An pastor Rev. Biakchhunga pawh chuan, " Anin thu a sawi dawn phawt chuan ka lo kal leh ang, a thusawi hi ka la ngaithla ngai lova," te a la ti tak deuh deuh a. Dan pangngaiin kan tang kual leh ngial a, mi dang te kan rawt kual vel a, ka thu leh hla an bengah a lut lo hle. Mahni lo maha thusawi hreh nak alaiin, hun lah chu an bichilh em em mai leh nghal a, ka huphurh ngei mai.

A tuk zanah chuan hun pangngaiah bawk kan tan leh  ta a. Pu Hruaian inkhawm a kaihruaia kei chuan thiam ang angin thuchah chu ka sawi ve  ta a, a hnuaia mi ang hian:-


"Zaninah thusawi turin min ruata ka huphurh em em a ni. Thusawi thiam loh nak laiin hun a bichilh a, chu a chhapah duh duh rawnga sawi mai ni lovin, thlamuanna thuchah lam hawi a ngai kher hmel bawk si, nizan leh tun inkar hun a tawi duh ngei mai! Eng pawh nise kan sawi sei lo ang a, kan tlingtla thuai mai ang chu.

"Kan Bible chang inghahna chu chang lar tak, mitinin kan hmelhriat em em, Isuan engthawlna thu a sawi hi a ni ang a. Mathaia 5:4 thu hi a ni.

"Lungngaite chu an eng a thawl e; thlamuanin an la awm dawn si a," tih thu hi.

"Lusun inhnemna hmunah hian  Rom 12:15 thu, 'Lawmte chu lawmpui ula; tap te chu tahpui rawh u,' tih thu hi a langsar em em a, sawi pawh a hlawh. Hei tho hi em ni ka sawi ang aw tiin ka inngaihtuah a, mahse Pathianin rem chang takin a chunga chang thlan Mathaia ziak a mi hi min rawn pe ta zawk a, ka lawm em em a ni.

"Tawng bul lam te kan hre pha ve lo va, mahse sap tawng Bible kan keu chuan he lai chang 'Lungngaite chu an eng a thawl e, thlamuanin an la awm dawn si a, tih hi Mizo tawng ngial ngana kan lehlin chuan, 'Lusun te chu an eng a thawl e, hnem an la hlawh dawn si a,' tihna a ni. Helai chang atang hian Isuan lu kan sun a remtihzia kan hmu a, lusun te a dem lo a ni. Mi tam tak chuan thihna hi a hlim zawnga hman an tum thin a, a life celebrate zawngin an sawi a, intihhlim hram hram an tum a, hlimna ni a ni an ti thin. Chutianga ti thei te chu an fakawm a, kan dem hauh lo. Mahse kan chhungte, kan thiante kan sun hian kan zawmpui pengte chan kan nih avangin a na a, kan ui a, kan tuar a, kan sun lo thei lo.

ISUAN LU A SUN
"Isuan lu kan sun hi a hre thiam em em a ni. A chhan chu a ni pawhin lu a sun ve tawh tlat. A unaupa Johana chu a lu tansak a nih khan a sun a, a tuar hle ta ve ang. A thih thu Johana zirtirten an va hrilh thuai a nih kha. Tin Lazara a thih tum khan Isua mittui a tla a, Isua mittui tla kan hmuh chhun chu hemi tum hi a ni mai niin a lang. Isua hian lusun awmzia a hria a, hmangaihte inkalsan natzia a hria a ni. Chuvang chuan kan then takte ngai a kan kun tlawk tlawk lai te, tawp hlei thei lo khawpa kan tah hawm hawm lai te, tap hlei thei lo khawp a kan hnang awl awl lai te hian Isuan kan lusunna hi min hriatpui a, min dem lo. Min dem lo chang pawh a ni lo, min thlamuan a, hnem kan la nih tur thuin min zakham a ni.


SERMON THUL KHUNG
"Isuan rawng a bawl tan dawn khan thlalerah ni 40 leh zan 40 fianrial hun a hmang a. Chu hunah chuan Setana pawhina  rawn thlem a nih kha. Khami hnu lawk khan rawng a bawl tan a, damlo te a ti dam a. A thuchah sawi hmasak ber chu he engthawlna thu hi a ni. He engthawlna thuah hian mi chanhai, chen beh te, a lainat zawng mi te a rawn hawlkim hle a. Chung zinga a pahnihna chu lusun te hi an ni. Vawikhat chu pastor pakhat kan venga a rawn awm tirh hian a thusawi hmasa berah thu ropui tak mai tha zet mai hi a sawi a, a ngaithlatute chuan sawi tha an ti em em hlawm a. A awm rei hret hret a, a hmasa ber ang kha chu a ni chho fo ta lo va, ' A sermon thul khungin bul a rawn tan alawm' an ti fiamthu thin a. Chutiang deuh chu thil kalphung a nih dawn chuan Isua pawh hian a sermon hmasa berah chuan a sermon thulkhung a phawrh ve pawh a ni mahna! A sermon tha ber a sawi hmasa ber a nih kher loh pawhin, a ngaih pawimawh ber chu a sawi hmasa ber a ni chiang mai. Chu a thu sawiah chuan LUSUN te hnemna a dah pawimawh em em a ni.

LU KAN SUN EM
"Isuan lusun te dinhmun a hriat thiam em avang hian lu hi kan sun tur a ni. Kan chhungten min kalsan a, chatuan ram min pansan lai hian mi thenkhat chu lu sun thei miah lo te, thenkhat chu tap thei miah lo te kan awm. Thenkhat te phei chuan an  tuar miah lo emaw tih tur te an awm thei. A vanduaithlak zawk em em a ni. Kan chhungte, kan unaute, kan thian te kan thenawm ten min kalsan laia kan thinlung he thihna hian a khawih che miah lo a nih chuan eng ang taka mi sehhel leh lainatna nei lo nge kan nih ang aw a tih theih. Thinlung sak, bul hnaia mite, thisen zawmpuite tuarna pawhin a tihtui zawh loh te kan lo nih hlauh chuan a vanduai thlak em em zawk a ni. Chuvangin kan lung a chhiat te, kan tah a chhuak a nih te hian insum a ngai lo, kan tuar tur a ni a, kan sun tur a ni. Isuan min hrethiampui em em a ni. Lusun lo te chuan hnem an mamawh lova, hnemtu atan Isua an mamawh thin lo. Amah kan mamawhzia, amah kan hnaih a tulzia kan hriat chhuah nan a chang chang chuan kan hriat thiam loh zawng pawhin Pathianin rem a rawn ruat thin a, kan tuar em em turin thihna te a lo thleng thin. Isuan lu kan sun a duh hun a awm thin. Heng hunah hian a nih tur ang ngeiin lu kan sun a, kan tuar a, kan mangan a, Amah kan auh hi a mawi em em a ni.

SUN AWM KAN NI EM
"Hmanni khan internet atangin mi ngaihnatawm ber ber te ka zawng khawm a. Nelson Mandela, Roger Federer, Mother Teresa, Mahatma Gandhi te an langsar hle mai. Heng mite hi miten eng vangin nge an ngaihsan aw tih ka ngaihtuah a, a chhanna ka hmuh tak chu, heng mite hian an mahni tanghma an hai lo mai a ni lo va, an dik em em a, mite tan an lo inpe nasa, an insengso nasa em em a ni tih hi a ni. A bik takin Mother Teresa te, Pu Gandhi te phei chuan an nun mite tan an hlan a, an mahni nawmsakna atan a thawk nep em em mai. An thih hnu pawh khan bungrua hnut chhiah ro thil an nei tlem hle a ni.

"Ringtute entawn tur Isua Krista hian a nun pum mite tan  a hlan a, a bo a bang awm lovin a engkim a hlan a, a thih hnu khan ama bungrua hnut chhiah eng mah a nei lo. Mite tana inpe, mahni in theihnghilh hote hi kan lo ngaina mai a lo ni. Chung mite chu an thihin kan sun lo thei lo. Kan ui lo thei lo. Tam tak hi chu he khawvela kan awm chhung hian kan han chet vel danah uiawm awm leh thih hnua han sun ngawih ngawih awm hian kan nung lo ve bawk a! Mahni tan ngar ngar kan tul a, mi dang hre chang lo lekin, dik leh dik lo pawh thlu lovin kan inhai vur a. Mite chuan tlachham se, keiin ka neih phawt chuan pawi kan ti thin lo. Isua zirtirna nen a inkalh thak a ni. Chuvang chuan he khawvela kan awm chhung hian mi dangte ngaih pawimawh a va tha em, mi dangte tana inpek a va hlu em chutiang ti mite chuan van nun an tem a, an nun a hlim a; an thih hnu thlengin ui leh ngaih an hlawh thin. Chung chu a ni kan sun tur chu, chung suntute chu a ni Isuan hnem a duh a, 'Lusunte chu an eng a thawl e, hnem an la hlawh dawn si a' a tih ni.

"Chuvangin unau duh tak, kan velah lusun an awm em, i tuarpui ang u, kan chhungkhat laina an boral em, i sun ngawih ngawih ang u. Keini hi kan hun a thlen ve hunah uiawm leh sun awm kan ni ve ang em, kan nun i inbih nawn leh thin ang u. Pathianin a thu kan sawi te kan za tan malsawm rawh se, Amen."