KA HRE LO LE!

1. Tuikuk zinga hmeltha an han tih ve deuh hi chu Mizo hmel ang deuh hi an ni chawk a. Mizo zinga hmeltha kan tih chu vai ang ret rawt an ni thung a. Vaiho zinga hmeltha chu a ngo lam sap ang deuh hi an ni leh a. Sap ho zinga tha an han tih tawh hian eng nge a an ve tak ang....sawi mai a har khawp;  angel ang deuh em ni ang....ka hre lo le!!

2. Sairang balu hi tun hma chuan TMB lian phur khat hi trip khat a ni thin a.Motor thar te zawk a lo chhuak a Tata 407 tih ang reng, phur khat chu trip khat a ni reng tho a. Motor a te tawlh tawlh trip khat a tlem tawlh tawlh a. Mizo te thiamna lamah kan sang zel a; hman deuh atang phei kha chuan vawi khatah trip hnih te an phur thei ta hial a!!!..hun lo kal zel turah eng nge a an zel ang..vawi khatah  trip thum kan phur thei ang em?...ka hre lo le!!

3. MLA inthlan hnuhnungberah khan  MNF hovin inthlan hma  khan pawisa sem an tum a, mi tam takin an hua a. Kohhran lama mar dektu te pawh khan an vei, veng tinah  vengtu tlawmngai an inruat a. Pawisa sem hlei thei lovin kan siam a. Chutih laiin zalen takin INC lam khan an sorkar chuan sum sem an tiam dum dum a, tuman khap enah leh huat enah an en  lo.Sum sem hi kan hua ni pawhin a lang lo va, kan hriat hauh lohvin a SEM HUN kan duh lo va, sem nghal mai kha kan duh lo mai niin a lang. Mahse INC chuan hei tun thlengin an la sem thei lo va, sem turin kan kar ta mah mah a! Mizo tam tak leh kei chuan a thlawna sum sem hrim hrim policy hi tha kan ti lo thin kha a ni a, mahse min tawmpuitu kohhran lama hnarkaitu te thleng hian an awm ta meuh lo niin a lang..a dik em ..ka hre lo le!!

4.Mizo film chang kang siam tum chuan location atan Shillong an zu thlang chawk a. Khasi ho chuan  Gauhati an pan thung a. Assamese film tha chu Calcutta ah an chang tam hle. Bengali ho chu tap chhaka film chang zo mai thin hi an ni a, film uluk erawh Bombay an pan kher thin. Bombay ho chuan film tha chan nan London an pan a. British film star tha film tha siam tum ho chuan  USA an pan nasa. American ho erawh chuan film tha leh ropui siam dawn  chuan SPACE lam an uar a, chumi hnuah khawi lam nge an pan leh tak ang..ka hre lo le!

5.Aizawl vela mi tam tak hian Mara, Lai, Lakher  tih vel hi kan hre hrang thiam lo va, an ni ho chuan na an ti thin khawp mai. Dem pawh min dem a; awm pawh  a awm a ni. Mizo te India ram lailiah kan zu kal a, Nepali emaw min lo ti a,  kan thinrim thin a, a then chu Japanese ang te pawhin kan inchhal phah nual thin. Kan thin rim a, Mizoram an han hriat loh chang te hian "Geography hre lo lutuk" kan ti kawk kawk thin. Vai ho chu western khawvelah an zu  kal ve leh a, an lo hre hrang leh tawh lo va. sikh ho te chu "Taliban" hmuhin an lo hmu vek mai a, na an ti a, "Khawvel ram dang chanchin hre lo lutuk" an ti kawk kawk a!!  Kan aia langsar leh pawimawh lam hi kan hre thei a, kan aia nep lam hian kan hriat an hlawh lo mai niin  alang!!Tumah indem tur kan awm lo ve; kan dik vek a, kan dik lo vek mai  mai ti rawh u!! Engtikah nge  khawvel mi zawng zawng hian kan aia chan chhe zawkte chanchin a nihna tak kan hriatpui ang le?...Ka hre lo le!!!!