ZU KHAP BUR HI!

Ka hriat sual loh chuan India rama state pathum Gujarat, Mizoram leh Nagaland te chuan mahni state-ah zu lakluh, in leh zawrh an khap bur mai a. Heng state pathum zinga pahnih Mizoram leh Nagaland te hi India ramah chuan Kristian bitna ber ramte an ni ang. Khawvel pum huap thlir chuan heng ram te hian zu khap burna dan chu an hmang mek; Afghanistan, Brunei, Iran, Kuwait, Libya, Saudi Arabia, Sudan, UAE leh Yemen te hi.

Zu khap bur  chung changah hian ngaihdan leh duh dan a inang lo nuaih mai a, roreltu te tan pawh ngaihdan siam thiam a har ngawt thin ang. Zu khap a nih chhan ber hi pakhatah chuan Kohhranin zu khap a duh vang a ni a, Kohhran huhang ngah tak duhdan hi sorkarna chelh loh hlau political party te hian sorkarna an chan hma leh chan hnu pawh hian an ngam ngang lo ni berin a a lang.

Zu chhe in avanga mi an han thih zawih zawih a, a bik takin kan hmelhriat hnai vai leh kan laichinte an han thih ngat phei chuan zu khapna hi thlah zalen mai se tih vawng vawng awl tak a ni. Zu  zalen se duhtu tak tak ten zu khap that lohna an sawi  hian, "USA-ah pawh an khap a, an khap hneh lo va, chuvangin an thlah zalen leh ta. An ni ram ropui leh thil tithei ber te pawhin an hneh loh chuan, keini India ramah pawh state rethei leh kil khawr ber hian engtin mah kan khap hneh chuang lo vang," an ti thin a, a dik thawkhat em em a ni.

Mizoram ang deuh thovin USA ah pawh zu khap hi Kohhran ho nawr vang tho a ni a. Kum 1919 ah an khap tan a, an khap hneh lo va, kum 1933 ah an sut leh ta a, kum sawmpali zet zu an khap bur ve a nih chu.  Hetia zu khap burna an hlih leh tak hnu hian USA ah chuan zu chu a zalen ta em em, khawi hmunah pawh a awm tlep terh tuarh a, duh duhin an in sup sup mai em ni tih kan hre tawk lo mai thei.

USA ah hian state 50 a awm a, chung state te chu county-ah a inthen sin leh a. State lianin county an ngah a, state tein county an nei tlem a. India rama District kan tih nen hian inanna an nei a, mahse a danglamna chu County hian sorkar hran, thlan ngat an nei ve hi a ni. US pumah hian county 3143 a awm a. A size  a intiat lo ang bawkin mihring bit dan pawh a inthlau hle a ni.

Federal sorkarin zu khap burna dan hlip mahse, a pawng apuiin zu chu a zalen nghal hauh lo. USA state 50 zinga 33 hian local sorkar ten zu an khap theihna dan tur hi ruahmanna an nei tho va. (Tin, state 17 te erawh chuan state thu aia khauh county leh local government ten an pass a phalsak lo thung a.)  Chuvang chuan USA county tam tak leh City council tam tak te hian tun thlengin zu an khap a, an la DRY char char a ni. Heng state pathum Kansas, Tennessee leh Mississippi te phei hi chu Dry state ang thaw thang a ngaih theih an ni a, a chhan chu heng state ah te hi chuan county sorkarin zu phalraina dan an pass phawt te  te a ngai a ni.

 Chuvang chuan heng state hovah hian dry county an tam em em  a ni. Mizoram ang chu ni ta se, state sorkarin zu zalen taka zawrh duh mahse khawi VC emawin an duh lo miau chuan an lalna chinah khan an la khap bur thei tho, tihna ang a ni. Tin county thenkhat chu ro (dry) lo, huh (wet) bawk si lo hnawm (moist) chauh eng emaw zat a awm bawk. Chuvang chuan USA ah hian a zawng a zain zu a zalen ta a ni lo va, hmun then khatah an khap bur a, hmun dangah an khap nel nual a, hmun tam takah an thlah zalen a. Hetianga an thlah zalenna hmun tam takah pawh hian wet hle mahse khawi khawiah emaw chuan dry day te a la awm zel tho a ni.

Heng zu khap burna county ho hi chhim lam state-ah an tam ber a, heng lai hmun hi Bible belt an tih thinna hmun a ni. Heng ho hi Kohhran chakna hmun, conservative ho chakna hmun an ni tlang pui a, dik tak chuan heng lai hmunah hian ringtu an la tha em a ni. Amaherawhchu an ni-ah meuh pawh zu lo vang hian economy a tla hniam deuhvin a hriat. Bon Jovi hla 'Dry County' kan ngaih thlak chuan heng ho hmun hi an deu ve hle tih kan hre thei ang. Chuti chung chuan hmun tam takah chuan zu khap bur hi an la duh em em a, theih ni se a ram pum ang hian khap bur an duh tih a chiang reng mai. Ka sawi tum chu, Federal sorkarin zu khap burna hlip mahse zu hi a zalen ta dur dur lo va, dimdawi tak leh fimkhur taka tihzalen a ni a, hmun thenkhatah chuan khauh takin an la khap bur a ni tih hi a ni.

Chief Minister ni ta ila:

Mizoram Chief Minister hi ni ta ila zu hi ka tizalen ang em? tih hi ka inzawt fo thin. Zu khap bur duh mi ka ni a, mahse kan khap hneh lohzia leh kan thatpui sawtna lang tur a van em avang erawh hi chuan tihzalenmai ka duh chang ka ngah mai. Sawi tawh angin kan lainate kan thiante, kan hmel hriaten zu chhia an in avanga an han boral phak phak hi chuan thin chu a rim duh a lawm!

A lehlamah chuan Kristian state kan ni a, khawvel eng kan ni tih kan hria a, hrai hnuaia awm ve mai mai tur chu kan ni si lo. Kan nun leh cheziaah azawng azain kan kristian thatna tilang chamchi thei lo mah ila, ruitheih thil khuahkhirh kan tum tlatna hian kan hmel chu khawvel mite hmuhah a titha ve chuan ka hria a. Harsa teh mahse kan rawngbawl ve theihna, a tu a te pawh kan tan tlan theihna nia ka hriat avangin kalpui zel hram hram tha ka ti bawk a. Drugs pawh kan khap hneh chuang lo va, kan khap hneh loh vanga kan phalrai ngai chuang dawn lo ang hian, zu pawh hi hneh lo chung chung pawh a khap talh chu kan tihawm niah ka ngai si.

A lehlamah chuan zu kan zawrh avanga kan sum lakluh tur itawm tham tak te, kan thalai nunna tam tak kan humhim theih phah turzia te kan ngaihtuah chang chuan phalral mai dik ka ti si. Tourism promote tuma zu khap leh si chu 'mei tuah lova chaw chhum tum a ang' vel ni tein ka hria a.  Chutih rualin zu chhiah it vanga zu zawrh a, zu man thawh khawm a ramthar  sut en han tum chu thil intuha lo tak niin ka hre bawk si. Ngaihtuahna a buai a ni. Kei ang tho hian kan ram hruaitute pawh an buai thovin ka ring a, "Kohhran chuan an rawngbawlna kawng zawnah thawk se, Sorkar chuan a tihtur huai takin ti mai rawh se," han ti pung pung mah ila, vote zawnna ramah hi chuan huaisen tak chung hian 'hlauh ruk' neih a awl khawp tih a lang reng bawk si.

Mi tam tak chuan 'Tun hma atang khan lo phalrai tawh ila chuan kan in thiam tawh tur' an ti thin a. A dik thui viau mai thei. Mahse chik taka ngaihtuah chuan  a zalen lai atang tuna an khap bur hnu thleng pawh hian a in ngai chuan an la in char char tho va, an in thiam chuang lo. Khap leh khap loh danglam map lo mihring kan ngahin a hriat. Khap a nih laia in thin te hian tih zalen hunah an nghei thar a rinawm loh va; mahse khap avanga in lo, tihzalen avanga in thar tur kan ngahin ka ring.

Engpawh nise, zu khap leh khap loh chung changah hi chuan tui lai ka rap chiang a lawm. Kalna lam tur reng ka hre lo. Mahse ram hruaitu lu chu ni ila, tuna kan dinhmun hi tha ber chu a ni lo tih kan chiang theuh si avangin, eng emaw ti hawi zawng tala ke pen chu a ngai dawn si. Chuvang chuan Chief Minister chu ni ila, USA an tih thin ang thovin referendum ka ko ang a, vote nei zawng zawngin 'HLIH" an duh leh duh loh vote thlakin an sawi thei tawh ang. Chu chu mipui lalzia lanna a ni ang a, democracy ram ropui kan nih kan lantirna tur pawh a ni ang.  Tichuan hniak tam lam lamah ka kal tawh ang a, thenkhatin min bauh thin mahse a tam lam duh dana ka kal chhung chuan ka dinhmun chu him khatah ka ngai thei ang.