Thursday, February 23, 2012

Ka Nuih Nasat Ber Tum!

I nuih nasat ber tum i hre thei em? Kei chu ka hria asin, ka theihnghilh thei lo reng reng. Ka tan chuan a nuihzatthlak thlawt a, mahse mi dang tan chuan a chuti ual lo mai thei.

He thuziak tifiah tur hian thuhma neih a ngai tlat:

Ka pa hi Middle School teacher a ni a, Zoram buai khan Vairengteah sorkar in an sawn a. Kan chhungin kan zui a. Tichuan Vairengteah kan awm ta reng a, ka nau nen phei hi chuan sikul kan kal tluan zak a. High School kan kal lai chuan zirtawpni  chawhnu hi chu "Chem ken tur" a ni nghal tawp mai a. Mau kan pu a, sikul huan kan hung reng mai a ni.

Pawl riat kan nih kum hian chutiang zirtawp chawhnu vawi khat chu pawnah naupang zawng zawng kan ding a, zirtirtu ten thu an puang a, chumi hnu chuan mau pu tur chuan kan kal darh ta sang sang a. Mi an kal liam tawh hnu chuan pawl sarih naupang pakhat mikhual, Saiphai naupang lo lut thar zak zum zet mai Tlana chuan zui tur a nei ta lo va, lai takin a ding zum reng ta mai a. Kei chuan a zah hlauin "Hawh kan bulah lo kal ve rawh," tiin ka va sawm a. A ni mikhual, Vairengte ram chin hre reng reng lo chuan lawm takin min zui ve ta a. Hemi tuma ka sawm avang hian ka chungah a lawm a, a hnuah, (vawiin thleng hian) ka tan a rinawm a, thian tha ber kan nih phah ta a ni!

Hemi kum 1977 tho hian Football club The Rovers Club thian zahovin kan din a, hruaitu kan thlang a. Kei chu President ka ni a, kan club din chhung khan President ka ni tluan ta nghe nghe a. Ni e, Tlana pawh chu kan member pakhat a ni ve a, football hi a zei lam a ni hran lo va, mahse member urhsun tak a ni reng a. Uniform pawh rei tak sum kan tuak hnuah Bagha ah kan zu lei a, a dum leh sen a rang a ni a, hak kan chak thei thin hle a, kan club zinga pawh "Form ha pha" kha chu induh ve tak an ni. Kha tih lai khan team khatah hian mi 7 kan awm thin a, uniform pawh pasarih chiah chiah kan nei bawk a! Hetih lai hian Vairengte-ah chuan Club pahnih dang JC Club leh Anthony's Club te chauh in uniform an nei a. Hun harsa tam tak kal tlang a, uniform kan han tuak ngah thei ropui kan intihzia te, Club ve tak tak nia kan inhriat ve zia te kha!

Hun leh kum te a liam a, 'mahni seh seh mual hranah' tiin hun kan hmang ta hlawm a. College te kan kal a, nupui faute kan nei a, kan inhre ta lo hle mai hlawm a. Awmna khua a inang tawh lova chanchin kan inhre zui ta lo hle mai a ni.

Tichuan le!

Kum 1997 khan Vairengte khua chuan 'Khaw Centenary' an lawm dawn a. Vairengtea awm tawh zawng zawng an chah khawm a. Kei pawh chuan nupui leh fa pathum lai ka lo nei hman tawh a. Centenary lawm tur chuan hmun hrang hrang atang kan kal khawm a, keini chhung pawh chu kan gypsy in Vairengte kan pan ve a. Kan riahna tur chu Mifco ho Bangla ah a ni a. Tlaiah kan thleng a, kan thlen tlai chuan thian thenkhat ten min rawn zim nghal a. Inbual pawh inbual hman lovin min hruai chhuak a. Motor ka khalh a, kan thian Tlana kan va pick up ta bawk a.

Vuivaina Ropui!

Hetah hian a lawm ka nui tak chiam chu!  Tlana chu a lo thu lut a, kan han inchibai lem luam a, thian dangte lam kual tur chuan kan tlan chhuak leh ta a. Tlana chuan kum 20 dawn hnuah chuan KA LAKA a vuivaina thuhla a chhakchhuak ta alawm! Motor khalhtu ka ni a, ka khalh hlei thei lo; ka mittui a sur zung zung a, ka khur a, a chang chuan ka kaih dawn emaw tih tur khawpin ka nui nasa, mak tak a ni.

Tlana chuan,"Rovers Club kan din chhung zawng khan hnatlang ka thulh miah lo va, sum tuaka inhlawhnaah ka kal lo ngai lo. In inah ni se ka lo leng zing ber a, in tukverh bula ka thu kir chhap reng a. Mahse, i lo chik em uniform kha vawi khat chiah ka ha ve! Chu pawh rei lo te chauh. Hak te kha ka chak ve thin a sin min haktir ve phal ngai si lo. Inhlawh chauhvin min hre khu luk a, form hak hunah min hre leh duh si lo.

Inkhelh ka thiam lo a ni bik lova, ka pian pawh a tha a, Kapa te kha engnge an thiam na vak, ball an manin an ban an thuai herh deuh a ni mai a, ka thiam ve tho  alawm, mahse min teltir  ve duh si lo.

Vawikhat chu Bangla Veng ho nen kan inkhel dawn a. Kan club kha kan vaiin mi pasarih chiah chiah kan awm a. 'Uhmm tun tum zet chu ka tel ve ngei dawn e. Ka bang dawn lo hrim hrim' ka ti rilru a ka hlim em em mai a. Ka rilru te tein 'Tunah chuan Zikteii ( kan hun laia tleirawl hmeltha leh nuih heh, fiamthu duh si, ngaihzawn awm tak, ngaihzawn theih miah si loh ) te mit hmuhah ball ka pet ve tawh dawn alawm' ka ti rilru a. Nang khan 'Tlana kha form kha ha la, tlan lut nghal rawh' min rawn ti ta hlauh mai a, ka va lawm tak em! Nia mi tir lut lo thei pawh kha i ni lo, midang awm miau hek lo. Khami ni kha chu ka vannei ve a ni.

Inkhelh kan tan a, full-back ah ka awm a, an inthah zo chauh kha kan lama ball a lo phei nghal ta mai a. Vannei inti takin 'khawnge kan pet let pawp teh ang' ka ti rilru a. Zikteii ten min thlir tih ka hre ran bawk a. Ball chu kan hlap pawp tur kha ka khupin an do zawt mai a, a kang ta luah luah mai a! Ka zak lutuk a, Zikteii nui ar ar kan hre zui leh nghal a!

'Pawi lo ve, hun a la rei lawm, inkhel kan tan chauh a lawm ka chet thatin ka hliah khuh leh mai ang' ka ti rilru a. Chutih lai tak chuan, 'Chuailova a lo thleng' tia au ri ka hria a, field chhak lam kan han en chho nak chuan Chuailova ( inkhelh chu a thiam hran lo, a tlan chak em em a, a fit em em ringawt) lo feh haw, chawl pawh chawl hman lovin a rawn tlan thla ta puat puat mai a, a fit ropui mai si a, ka mangang ta em em mai a. 'Ummhh min thlak dawn ngei mai' ka lo  ti rilru a,  khami tuma Chuailova ka huatzia kha chu, theih ni se a hleh a hleh ral raih hi ka duh asin!

Chuailova field a lo thleng thla a, hlauh ang ngeiin nang khan min rawn pan a,'Tlana form kha phelh la Chuailova pe rawh' in rawn ti a. I tan ka rinawmzia te, inkhelh ka zei ve tho zia te ka hai si lo va, a na asin! Form chu ka pe tau deuh suk suk a, thlan te khan lo huh zawr vek hman tal se a tha tur. Ngui burin filed kovah ka thu a, Zikteiin nui ar ar bawkin, 'The Tlan i hah der elo?' min la rawn ti zui a! Za lo zet hian 'He he he' ka ti ringawt a.

Ka thinrim khawp mai a, chutah nang khan min rawn pan leh a, ' Uhmm thupha a rawn chawi dawn ngei e, a awm a lawm, minute khat pawh tling mang lo form hak ve ngawt te chu tunge lawm reng ang. Ka thawk rim ber ziah bawk si' ka lo ti rilru a. Ka bul i lo thleng a, 'Tlana, Valthanga ( kan club member rinawm,  99% pawh ni pha hauh lo) nen hian baltin kha la ula tui zuk chawi ta che u, inkhel ho in atan!' i la rawn ti a nih chu....."

Sawi tawh angin ka nui nasa lutuk a, engmah ka ti thei lo. A sawi mar tha si, tawngkam a thiam si, a vui tlai khawhnu ang reng bawk si! Amah hi fiamthu thiam tak a ni reng reng a, a khawsak dan nuihzatthlak tam tak a awm, sawi vek lo ila.

Engpawh ni se kum 2005 a lo her meuh chuan an sawi America lamah kan intawng leh ta a. Vuivaina thar sawi tur a awm tawh lo. Beach-ah te kan kal a, Washington DC te kan fang dun a kan veivahna chu changkang tak a ni a, mahse kan titi chu a ngai tho, Saipum, Saihapui Saiphai tih vel mai mai tho a ni, mahse tu dang zu ngai bik chuang hauh lo ia!

Hei ngei hi amah ' The Tlana'; Ocean City Maryland beach nuam berah kan kal a. 

Board walk-ah te kan kal a; tui te kan cheng ve ngei e.. mahse kan sawi ho chu thu ho te te hlir a ni..












"

Thursday, February 16, 2012

MONU leh MOPA

Vanglaini nitin chanchinbuah hman ni deuh khan Pu Chhuanliana BVT, thu leh hla lama kan mi ril neih chuan Mizo tawnga kan neih loh leh kan neihsa hman rem chan hleih theih loh siam fel a tul a tih te a rawn ziak chhuak a. Chung a ziah chhuah ho chu a vaiin ka hre seng tawh lova, mahse ka hriat reng chhun pakhat chung chang han sawi ve ka duh a. He ka blog tlawmte hian amah Pa Chhuanliana chu a thleng zo ngut pawhin ka ring chuang lo na a, amah ka ngaihsan leh zah avangin a thil buaipui mek atan hian ka ngaihdan tlem han thawh ve hrim hrim ka duh a. He ngaihdan hi ani leh Mizo mipui te hian eng he hu-ah min ngaihsak lo a nih pawhin ka vui chuang lo;  chuvang chuan intipachangin ka rilru ka'n thai lang ve hrim hrim  ang e.

A buaipui pakhat chu Mo (bride) leh a nu leh pa te, bridegroom leh a nu leh pa te Mizo tawnga sawi dan awm fumfe lo chung chang hi a ni a. "Inneihnaah thlalak lak hunah te puan fo a ngai si a, a hmanhmawhthlak a ni," a ti tain ka hria. Ni e, kan ngaihdan tlanglawn berah chuan mo chu bride, mopa chu bride's father a ni mauh mai si a, mo pasal chu tunge ni ta ang tih hi sawi fel ngai lai chu a ni.

Ka ngaih dan leh duh dan tihian han sawi ta ila, sawtpuina mual mual kan neih phah hlauh mahna....

Inneite kha MO an ni ve ve a. Tichuan "Mo kan lawm" kan tih pawhin kan lawm ve ve a ni. Hmeichhia chauh kan lawm bik lo. 'Krista mo' atan pawh mipa kan tel ve a, chuvang chuan mipa pawh hmeichhia pawh mo kan ni thei a ni.

Sapin bride an tih hi 'mo' ni ngawt lovin, keini chuan monu kan ti a, bridegroom an tih hi 'mo neitu' ni tawh lovin, mopa kan ti leh mai a.

Bride's father chu monupa a ni a, bride's mother chu monunu a ni leh mai a. Chutiang zelin monupi te, monupu te, monuni te a awm thei ang.

Chutiang bawkin bridegroom chu  mopa  ani a, a nu leh pate chu mopanu leh mopapa an ni leh mai a, a pi leh pu chu mopapi leh mopapu an ni a, mopani te pawh kan nei thei ang chu. Ti hian a fel thlup mai, ka ngaihdan chuan.

Mi thenkhat ngaihdan ka tawm chu, "Mizo tawnga kan nei fumfe loh te hi chu kan hnahthlakte tawng atangin la ila' tih hi a ni a. Mo kher hi chu heng hnathlak ho pawh hian mo an ti mai theuh hlawm bawk avangin, lakna tur fumfe a awm meuh lo niin a lang. Chuvang chuan kan tawngin awltein a siam fel theih mai si a, a chunga sawi ang hian sawi tawh ila, kan buaina then hi chu a chingfel mai lo maw?

Thursday, February 9, 2012

CELL PHONE THAR KAN NEI

Keini ang thawh chawpa hlawh la, thawh lo chuan hlawh nei lo; theih tawp chhuah a hna thawh chang pawh a bei tham te te hlawh chhuak thin tan hi chuan sum hmanna hi 'tam' kan va ti hma thinin, kan tangka han hman chhuah vena te hi 'to' kan va ti hma thin tak em!

Thiam taka sum han hman dawn ngial pawh hian kan sum lakluhin kan mamawh a phuhruk phak miau loh hi chuan eng teh chiama han themthiam hleih theih pawh a ni meuh thin lo. Lung delh loh, thing delh loh ta na na na chu kan  fate pawh an lo thang lian ve zel a, tun hma an tleipui mai mai thin kha an lo hlimpui zo ta lo va, thil thar dang an mamawh a. 'A zual za pui vaihlenhlo' tih ang maiin sum dawng mite lah chuan tun hma awm hlei lo thil thar an lo hmu chhuak thar a; mawi zet zetin an lo zuar thar zel rawl nen. Chu achhapah tun hma atanga kan lei ngar ngar thin kan nitin mamawh te lah chuan tlawm lam an pan duh der lo bawk a, a to chho hret hret mai ni lo hian, a to chho duai duai ta mai bawk nen, sum indaih loh chu na duh tak a ni. Chutih laiin thenkhatin, " In hausa tawh awm," te an lo ti thla ve rawk bawk nen.

Sum lakluh ti tam turin hna han thawk uar dawn ngial mah ila, kum lo upa zel nen kan taksa leh pumruain a tlin lo chho hret hret a. Thawh apiangin khup an ri tuarh tuarh a, a engah pawh mai hian kan 'awiah' thawt thawt zel tawh mai si! Mite aia tan lak a ngaih avangin mite aiin han thawk uar dawn teh reng pawh ni ila,  chuti maiin duh ang ang thawh tur hna a lo awm kher lo va, duh reng vang ni lo hian tum tam tak chu kan han awm awl leh vung vung thin ang lawi a, induhthawh a nat tehlul thin nen hian.

Hna awm ni se, taksain tlin ni teh reng pawh nise kan mawmawh ang phuhru tur khawp thawk chhuak tur chuan mu map lo, a thim a var thlu lova thawh a ngai hrim hrim a, amaherawhchu, kei pui hi mi azawnga mut duh kan lo han ni leh zel roh bawk nen. Mite chuan darkar nga-ah mut an kham lai hian kei chuan darkar riat tal ka mamawh a, chuti zat ka mut loh chuan atukah hian en tlak ka awm lo chang a ni lo, keimah hian en tur pawh engmah ka nei thei lo hrim hrim. Na bura inhriatna ka nei tlat a, damlo ni tein ka inhria a, lu a rit a, thil dang chhip chhuan belh tlatin kan inhria a. Engmah hi a fiah lova, hna chu han thawk lui teh reng pawh ni ila, hlawh hmu tlakin ka thawkpha lo hrim hrim. Khua hi a var mawlh lo.

Sum harsatzia leh duh duh lei mai theih a nih lohzia te hi fate han hrilh ve fan thin mah ila, beng chuan an hria, an hre ve khawp; mahse thinlungah a innem kai mawh a ni chek ang, sawi zawh hnu lawk hian ngen ngai an ngen leh mai thin! An tan pawh hriat a harsa ve tho a ni ta ve ang, a chhan chu an thiante tan engmah a khirh ve lo va, an thian ten thil tozia hre ve tlat hek lo. Lak luhin a tlin hi chuan thil hi a to mawh khawp a, vawksa man te hi mihausa tan to mawlh hek lo. To tia kan iak kan iak hi chuan tu thiam loh mah a ni teh chiam lo; kan sum lakluh a tlem tihna mai a ni a, vantirhkoh tawngte pawh thiam hial mah ila, chu lo inhrilhfiah dan kawng dang vak a awm thei lo.

Thil to zia te, kan sum lakluh bei thamzia te, sum hlutna tlak hniam takzia te fate hnenah han sermon fo takah chuan, sawi tawh angin, a zawng a za hre reng vek se su lo mahse an thin an lungah cham bang a mual maul chu a lo awm ve a ni chek ang. A chang hi chuan an ei peih loh zawngah te, an it miah loh zawngah te, thing/hlui an tih lam chi-ah te hi chuan sum sen thlawn an ngai thei lo hma hle ang lawi a. Keinin a tlo zawng dawn avang te, a hrisel ngaihtuahna avang te, a tlawm deuh hret chhutna  avangte a thil kan han lei te hi an tan chuan sum renna ngei ngei tur, thil lo thlawn, a chuang bang, tul lo tawpa sum khawhralna mai a lo ni thung tawh thin!

Sawi tawh angin an han thang lian deuh deuh va, thil thar lo chhuak reng nen, mamawh a lo pungin an lo zar zau zel a. An mamawhte hmuhpui thiam hnuah kan  han lei dawn meuh hi chuan quality hrang hrang a lo awm zui a, a tha ber a nih em loh pawhin a tha ber pawl tal lo chu kan han sit nghal a, a tlawm lam zawn chu a har duh tawh thin. A man tlawm leh model hlui lam chu an la neih ngai hauh loh pawh ni se, an han sit sa a, an neihah an teh tawh lova an thiante chu certer-a hmangin an thiante thil neih atangin rin ngil  taka ziakin an teh tawh mai thin. An thiante thil neih tawh hnu chu an la neih ngai hauh loh pawh ni se 'thing/hlui' a ni nghal ngawt mai a ni.

Electronic lam thil phei chu tam tak hi kan neih hma chu sawi loh, a awm a  ni tih pawh kan hriat ve hma hian a lo hlui der tawh tlangpui a. Kawi suruta sum kan tuak hnua lei kan han tum ve meuh hi chuan, a aia chhuak thar, tha zawk, mawi zawk, thawkhlawk zawk, daihzai zawk, tlo zawk, vilzuina(warranty) tha zawk, pian nalh zawk, te fel zawk a chhungril lam lian fe zawk si ang chi te hi a lo chhuak leh duah tawh thin a. Chu chuan kan lei tum ran ran ngaihtuahna a bual buai leh lo thei thin lo.

Ei tur ni se a hrisel lo lo hi an duh emaw tih mai tur a hi a ni a. Nia zep nak emaw, a hriselna lam hawi atana tha tur ho hi chu a tui lo duh tlangpui thin reng a. Ei tur lam thil lei reng rengin a hrisel tur leh a man tlawm leh a tui ngaihtuah kawp vek a ngai a, chung thil pathum chu mawi taka balance a ngai thin. Hriselna lam kan thlahthlam chuan kan hun lo la kal turah kan ngaihtuah awm a, a man tlawm kan thlauhthlak erawh chuan kan tun hun din hmun kan tiderthawng thung. A tui kan ngaihsak hauh loh chuan tuemaw 'tau' chhungkua-ah kan chher chhuak thei bawk si, themthiam a ngai thin khawp mai.

Sawi tum lamah lut tawh ila:

Ni e, a chunga ka sawi ang khi kan chhungkua chu a ni.

Kan chhungkua hian tradition pakhat kan neih chu cell phone hi High School an luh hun apiangah an nei ang tih a ni. Naupangte hian cell phone hi mamawh an han inti thei khawp a. Mahse sawi tawh angin kan khawsak awlai lohzia an hriat avangin nasa chuan an ngen ngam lo thin. Kan fate hemi kawngah hian ka fak khawp hlawm mai.

Ninth Grade an han nih hian High School an lut tan a, chutah chuan phone an nei ve thei ta a, kan phak ve ang tawk thlirin an duh ang an thlang thei thin. Hemi hun hi a phurawm thei khawp mai a, heng hun hi hun ngaihawm a la ni ang. Amaherawhchu kumin hian chu family tradition chu kan bawh chhe ta a,  uiawm ang reng tak a ni.

Kan fanu te ber chauh hian cellphone a la nei ve lo va, a awt ve thin khawp mai. "All my friends have  phones...".".. Its really embarrassing to always ask them to use their phones..".."Paa isn't time yet.."..." I really need it .." tih vel a ri ta fo mai a. Kan chhungkaw tan hian Sprint-ah family plan ka la a, chu plan-ah chuan weekend leh zan lam tawp chin nei lovin hman thiang a ni a. Chhun bik atan minute 1500 kan nei a, cell phone leh cell phone chu a man chawi loh a ni. Text leh internet chu tiam chin awm lovin an zalen bawk a.

Kan fanu chu pawl sarih chauh la ni mahse a thiante ho zawng zawngin phone an nei tih kan hriatpui bawk si, chhungkaw rorel, Persia dan ang thaw thanga nghet kha a phet tan ta ruai ruai mai a ni. Harstna pakhat erawh kan nei. Kan fanu hi a ute ho ang lo takin  tladah ang reng riau a. Phone chu han leisak ta ila a tibo dawn emaw, a tichhe thuai dawn emaw tlat hian kan hria a. Heng laiah chuan phone hi  contract nei vek a lak a ni a, a tlangpuiin kum hnih a ni tlangpui. Kum hnih ral hma chuan disconnect theih mai a  ni lo va, disconnect kan duh talh chuan sum sen belh teuh a ngai a. Tin, kum hnih ral hma chuan phone hi thlak mai mai theih a ni lo bawk. Kan fanu hian phone man to deuh va kan lei kha a tibo emaw a ti chhe mai dawn tlatin kan hre si a, rilru a tibuai a ni.

A tawpah chuan sprint dawrah ka kal ta ngawt a, "Ka phone line ka tihbelh duh a, mahse ka fanu hi a tladah si a.." ka ti hman dek dek a. " I see, you need a cheap phone.." an lo ti nghal mai a. Kei ang tho hi an lo tawng ve nual tawh a nih hmel. Kei chuan, "A dik mahse cheap phone lei ta ila rei lo teah a aia tha a duh ang a, upgrade turin kum hnih lai a ngai si a," ka ti a. A ni chuan,"  Ok, I know how to get around. Buy a cheap phone online and I will activate for you and you can upgrade anytime you want," a ti ta mai a. Chu chu ka duh chiah chu a ni.

Tichuan phone man tlawm chu ebay-ah ka zawng ta a. Tha deuh mai ka hmu a, palm phone a ni a. Ka lei a, a lo thleng thuai a, a ruk tein ka tinung ang chu tiin Sprint dawrah ka va keng phei a, "This is a smart phone you will have to pay $10 extra every month" a lo ti leh si.  Ka fanu run dal leka phone leisak ka duh khan smart phone phuin ka hre si lo. Ka haw leh ta hrih a, smart phone ni lo chu online-ah ka zawng leh ta a ni.  A tawpah chuan ka duh zawng, a phu tawk awm chu hmu tain ka inhria a, ka lei ta a. A tuk lawkah a lo thleng a, nimin khan. Vawiin tlai khan sprint dawrah phone chu ka va keng phei a, a ruk tein ka va tihnuntir ta a.

Zan riah ei kham chuan ka fate ka ko khawm a, puithu takin ka fanu Dini chu phone chu kan hlan ta a. A lawm khawp mai a, mahse a duh ai chuan a cheap deuh a nih hmel. A nur deuh hlek na a, a ute hovin, an han khak laih laih a, " Pawl 7 ah tuman phone kan nei lo," "Kha aia tha kha i phu miah lo.." " I duh loh chuan kir leh mai tur.."  " Phone tha i duh chuan High School i kal hunah keini angin i nei ve ang a, la nghak mai rawh.." te an han ti nak nak a. A ni chuan chi-ai ang reng takin, " I want it,  I want to keep it..thank you Apa.." an tih tak hnapah chuan kan nem leh zo ta a. A phone chu an en vat vat laptop nen an inchhawp a, a thiante an hrilh kual a, a thiante chuan an phone number te an rawn text ta char char hlawm a. Chung phone number te chu a save zel a, a text pahin a tawng mawlh mawlh bawk a; a hlim ta em em a, a ute ho pawh chuan engtin mah an nawrzui ta lo. Tichuan kan chhungin vawiin atang hian phone kan nei ve ta a ni.

Kum 20 a liam leh chuan he thu mai te pawh hi a ngaihnawm ngawt tawh ang, kan tan tal chuan, Pathian zarah kan la dam zel a nih chuan.....


Eng thil nge ni ta, a hre lawk hauh lo...


A phone thar chu an bel chiang a...

A hnu lamah chuan a hlim ta viau...

Saturday, February 4, 2012

KHAP BUR TUR

Mission Veng,Aizawl pic: RD-a
Mi tam tak chuan Mizoram-ah hian khap a tam lutuk an ti a, an sawi sel nasa mai a. Mahse thil khap a la tlem em avangin kan ngai thei lo mai niin a a lang. Thil tha lo, mimal ni lo, kan za atana tha lo hi chu khap zel sel a, khap loh na na chu mahni chhia leh tha hriatna hmanga en mil tur ni thung ta se a tha ang.

Ram chang kang leh hmasawn apiangah khap a tamin a bawh chhetute hremna pawh a na a, miin dan an zawm tha thin. Dan bawhchhetute kan hrem loh fo leh dan mumal kan la nei vak loh chuan kan la chang kang lo ti ila kan sawi sual kher lo ang. "Khap a  tam" ti a kan iak kan iak chhung chuan khap a la tlem lutuk tihna a ni.

Hetia han ngaihtuah mai pawh hian khap tur a la awm teuhin a hriat. Zofate hma kan sawn theih nana khap tul tak pakhat chu, "Mahni vulh loh thah leh mahni chin loh thei/thingkung kih loh, rah lawh loh," a ni. A tawi zawngin mahni kutkawih ni lo atanga hlawkna chan tum  phet hi a fair loh em avangin khap vek chi niin a hriat.

Pisa lamah a ei ru thei ten an ei ruk kan haw em em a, kan sawi kan sawi a. Mahse thingtlang lamah ram chhuak peih ten an duh duh an chin pawh ni lo, an vulh pawh ni lo, an kap a, an perh thla a, man hmiah hmiah a, an lo a, an awk a, an kit a, an hrai a kan sawi kan sawi leh si lo. Heti zela hleih nei taka kan kal chuan hun rei lo teah kan ram sum leh pai te, nungcha leh ngaw te, lui lam hausakna te kan chen chereu fai leng ang. Kan inchhir ang a, let lehna dan a awm tawh dawn si lo. Chuvang chuan hman atang khan inzirtir a ngai a, inzirtirna tha ber chu khap bur hi a ni.

Thing leh mau te,  bulbal leh hrui te, thei leh thlai te, nungcha boruaka sava leh khuai te, ramsa leh leia tleng chi te, lui lam chakai leh sangha te thleng hian kan kutkawih, kan chin leh vulh a nih loh chuan kan ta bik a ni lo tih hriat a, heng ho ka theih tak emaw tia lo pumhmawm tum hi corruption lian pui mai; dan lo taka thil tihna  a ni tih hriat a tha.

Ram kal nuam ka tih vang te, sa kap tura ka them thiam em vang te khan chutiang hamthatna chu ka phu ta a ni lo va. Kei ang thovin midangte pawhin an phu ve a, mahse an hawihhawm vangin an ti ve lo mai a ni tih hriat a hun ta. Mitinin a ti chereu zawng ni lo, a humhalh zawnga tan kan lak loh chuan kan ram hi awmna tlak lovah kan siam thuai dawn a ni.

Mi te chuan an ram an hmangaih a, an ta ang takin an cheibawl a, an duat  a. Keini Zofate chuan mi ramah awm hawh ang lekin kan ram kan en thinin a hriat. Mipui kan fin miau loh chuan khap bur hi a kawng hmang ber a ni mai zel ang. Chuvang chuan  khap bur hi hnawk i ti thin lo ang u.

Heng, ram sa te, sava te, sangha te, chakai te, chengkawl te, kaikuang te, thei hrang hrang te, hrui zik te, thlai hrang hrang te, mau te, thingte, mei hawl te reng reng hi dan lova zuar an nih chuan lei lo ila, lei lo mai ni lovin  dan bawhchhetute chu mantir ta ila. Miin dik taka an tia an zuar a nih erawh chuan ngaisang ila, hma an sawn theih nan tanpui bawk ila, tichuan loh theih lohvin hma kan sawn chak ang.

A tehna ber tur chu, "Mahni kut kawih liau liau ni lo mahni hamthatna bil atana hman hi sual a ni" tih hi ni se. Mahni phak tawk leh theihna zawnga  eirukna a nih ve avangin politician te eirukna te, sorkar hnathawk milian ho eirukna te nen zia rang leh kim tlang inang diak diak lo mahse chhul khat kual tho an ni tih i hre reng ang u.