Kan ram hi nuam lo deuh ta se........

Mizoram hi a ral muang a, ei zawn a awl a, khawtlang leh Kohhran te a nuam vek mai a; a nuam lutuk hi a hrehawm ni berin ka hria. Kan dep lawk Burma ram chu khawvel ram hahthlak ber pawl, thin ti rim mai thei sorkar a ni a. Kan thlang lamah manganthlak tak sorkar,khawvel tu man an ngaihsan bik loh, Bangladesh a awm leh a. Kan hmar lamah hmun ralti tawp khawk Manipur a awm a.  Tin, ngai teh, kan chhuahka ber Cachar lah chu khu ti zat mihring awm teh meuh mahse thian tha  pakhat pawh han neih theih na lek loh khawpin an lo phakar leh a!

Hetiang hual vel ram kan ram erawh chu, kil tin atangin min nek mahse kan tang fan fan a, mi tha tawngtaina avangin a la ding chang zel a. Kan inunaunate, kan inlainatana te, kan tlawmngaihna te, kan rinawmna te a la thang duang zel a. Thalai lo chawr chhuak te chuan nuam an ti a, YMA ah te KTP ah te rual ute hnung zuiin tu dang ngai lovin an hun zawng zawng deuh thaw khawtlang tan an hmang a. Khawtlang tana kan inhman deuh vek a vang hian khawtlang pawh a  nuam reng a, chhungkaw tan inhmang nasa ila chhungkua a nuam leh mai bawk ang a.

Kan chhut ngun ngai erawh chu, chhungkua fail se khawtlang a nuam reng thei ang em? tih te Khawtlang nuam lutuk hian ram dang leh hnam dang el kawngah min ti thuanthu deuh lo maw? tih te Khawtlang nuam lo Burma ram te, Manipur te hian mimal taka thahnem ngaihna an ngah avangin a ruk hian min pel nasa a, rei lote ah an rawng kan bawl vek mai lawng maw? tih te.Pawnlam miten kan khawpui sum dawnna  lian vawn fung an chan fur chuan keini chu talhfiak hmawr bak chan kan nei lo mai lawng maw? tih te.YMA leh KTP hruaitu nih hnial loh vang hian kan hun tha kan khawh khaw tlai a; kan zuan phak tur mang mang hi mi tam tak hian kan zuan thlen phak loh phah lo maw? Chung  leh thil hrang hrang avang chuan, kan khawtlang nun hi ti nuam lo deuh ta ila, Mizoram te hi ngai lo deuh ta ila,  khawhar tuar a zia ang a, pachang takin ram dang leh khawvel zau zawk mi fate el turin kan tha leh zung kan sawr bing thei deuh zawk lawng maw? tih te pawh hi ngaihtuah ve fo a thain ka hria..