Thlasik Eng!

Kan in atanga mel khat leh a chanve velah hian Seneca Creek State Park, mawi leh zau tak mai hi a awm a. He park hi kilometer 25 biala zau a ni. A lai takah dil lian leh mawi tak a awm a, chu chu Clopper Lake an ti a; chumi hual vel chuan kawngpui mawi tak tak an siam bawk a.

He park hi a larin tlawh pawh a hlawh ve viau thin. Tun hma deuh kha chuan Mizo Society Of America pawh hian Picnic na hmun atan an hmang ve thin. Picnic shed mawi tak tak eng emaw zat a awm a, infiamna leh inawm tleina tam tak an siam bawk.

He park-ah hian kum tinin Winter Lights an buatsaih thin a. Eng mawi tak tak dahin thlasik chhung hian dil kam chu motor a tlan kual chunga fan theih tura siam ani thin. Luh man a awm a, motor pakhat ah $15 zel an thing thin a. Thenawm lawka awm a nih bawk avangin kum tinin tlawh ang u ka ti ve ziah a, mahse kan kal chang hian an khar zan emaw, a tlai tawh avanga luh phal tawh loh hun emaw, eng emaw harsatna hian min nang ziah a; kan lut thei lo ziah thin.

Kumin chuan luh ngei tumin kan inbuatsaih a, Dec 23 2011 (zirtawp ) zanah chuan kan inphur chhuak ve ta am am a.  Heng a hnuaia milem te leh a dang tam tak  kan hmu a, mite chuan nuam an ti a, a hlimawm ve khawp reng a ni.

Motor chu kan inzui lut diah diah a.

Enga an chei park chhung kawng hi kilometer 5 vel laia thui a ni a. Motor head light kan off a, muang te te in kan inzui a. Kei chuan kan ngai thei ta thak lo va, motor khalhtupa ber kha motor ka RUI ta chiam mai a. In kan thleng chu ka lir lut tawp hi a ni ber mai. Ka mu nghal char char a, a tuk zingah lu la hai bur chungin ka tho thei tawk...