MIKHUAL KAN NGAH BER TUM.

Mizorama KTP leh YMA te kan han khawmpui tak tak thin mai kha chu, mikhual kan tam thei bawk a, thlen in te pawhin riahna an chang mang lo va, an riak chhuak lek lek thin chu a ni e. Khawmpui lianah hian, Thenzawl, Champhai, Kolasib, Kawnpui, Kawrthah,Saitual,Khawzawl leh Ratu ah te ka kal ve tawh a. Anuam ber chu a hrehawm ber tum kha a ni lawi a, chu chu Ratu kha a ni mai thei. Ratu KTP khawmpui khan sawi a hlawh a, hriat reng a hlawh a, a hlimawm ber mai! Ratu KTP khawmpui hma khan tui van turzia kha an sawi lawk nasa khawp a, kan han thleng ta a, a lo vang ngiang reng a. Chaw kan han ei a, dal kan hmeh a, a hlimawm khawp. Chaw ei kham chuan kan thian Pu Zomawia ta pek chuan,"Tui a vang a vang an ti a, a lo vang lo khawp mai, an dal reng a dal mai," a ti ta leng leng mai a. Kan ip chawih chawih mai!

"Khaih khaih insum hram hram rawh," kan ti a. "Mai mai a, an bang te hi rawng ka hnawih thar e te an ti a, chawhmeh lei nan hmang zawk se a tha ang chu," te a la ti ta deuh deuh. Kan pui thei a nia!

Ni e, mikhual hi kan that hnem chuan ei tur te, in tur te hian a daih mawh thin. Mahse hlim tak leh inphal taka min lo thleng thin tute hi an va hluin an inpekna a va sang thin tak em. Tluk loh rim an nam, kan lawmthu sawina te hre pha dawn hauh tawh lo mahse, kan thlen in te chungah khan lawmthu kan sawi tha leh duh a ni.

Khawpui zawkah leh in nei tha zawk te hian mikhual thlen kan tim a. "Khum kan nei lo, pindan kan nei lo, mikhual kan thleng thei lo ang," kan ti mai thin a. Mikhual te hrehawm kan hlauhna avang chu a ni ngei a, mahse mikhual thlen kan tim hrim hrim vang a ni mai thei.

USA Mizo te zingah chuan khawmpui te awm ve vak hek lo, mi khual thlen dur dur hi har deuh mai a ni. Mahse July 19 21012 ni zet kha chuan mikhual in riak kan ngah ve khawp mai. Mak tak a ni. Kan mikhual ngah record a ni a, chumi chanchin chu tlem han sawi ila. A hlimawm em a!

1. Rev. Vanlalbela chuan USA ah rawngbawlna nei turin min rawn thlen chilh a. Kan lawm hle mai a. Kan fanu te zawk pindan chu kan luahtir a, kan fanu chuan chuan a u pindan a fin a. Kan awm ve nawk nawk a.

2. Rev. Vanlalbela rawngbawlna Pathianin mal  a sawm a, mi rilru a hawng a, kum thum chuang lai inthen tawh Presbyterian Kohhran pahnih pawhin infinkhawm leh kan duh ta hial a. Chu infinkhawm lawmna chu July 19 2012 Pathianni-ah ruat a ni a. Hemi a thu sawi tur hian Rev. H.Vanlalruata te nupa Atlanta atangin an lo kal vang vang a, kan lawm em em a; kan inah an thleng a. Kan fanu upa zawk pindan chu kan luahtir ve leh a. Kan fanu pahnih te chu kan pindan lama rawn inpu lut mai turin kan ti a.

3. Ni ropui tak hmang tur kan nih miau avangin Rev. J.H. Vanlalhruaia (kan pastor), Tyron Pennsylvania a awmte an lo kal ngei ngei a ngai a. Vanneihthlak takin an chhungin mi panga an lo kal thei a, kan inah an rawn inpu lut ve leh thei ta bawk a. Kan fapa te mutna kan basement chu anni pual hian kan han ri ruat ve leh ngawt a. 'Tlangval ho chu living room ah te an mu thlep ve mai mai tawh ang chu' kan ti mai a.

4. Rev.H.Vanlalruata fanu Puipuii thiannu Ethiopia nula Miss Titi, Atlanta atanga an rama haw tur chuan a flight a miss hlauh mai a. Chuvang chuan Washington Dulles Airport a nileng zankhua awm mai mai ai  chuan tiin kan naute kan zuk lamtir vang vang a. A ni pawh chu a rawn inkhai lut ve leh ta hlawl bawk a.

Kan fate an tet lai kha chuan kan in hi kan tawk ve tiu teu viau tho va. Mahse an lo nulat tlangval takah chuan kan tawt a ni ber mai. "He lai hi tlem i zauh ang, i nawr pawng ang," kan tih mai mai ang kha a theih ve der si loh. Chuvang chuan bungrua pawh hi kan nei tha thum ngam lo va, a lova awm theih loh chin chauh bak hi chu engmah kan nei lo reng a ni. Heti khawpa tawt sa nih nak alaiin malsawmna hetianga mikhual lama kan han dawng leh hi a ropuiin a lawmawm em em a, ngawih bopui phal chi niin ka hre lo. 'Mikhual neih theih lai chu vanglai a ni e' an ti thin a, a dik tak tak a nih ngai chuan tun hi kan vanglai a ni ve ta reng mai!