ZOBERS: LU KAN SUN!

April 20 hi kan inneih anniversary a nih vang leh kan fapa Zela piancham a nih vangin eng emaw ti takin kan nghak hlel thin a. Kumin 2012 pawh hian hemi ni hi kan chhungkaw tan ni bik tak a nih avangin a hma fe atangin kan ur lawk a, engtia hman tur nge ni ang tih kan sawi ho laih laih thin. Kumin phei chu zirtawpni a nih hlauh avangin a phurawm leh zual a, weekend intan zan a ni a, a thawventhlak bik a ni.

Ka pa, Upa Tlanghmingthanga, Mission Veng a dam loh a vang leh, ka pizawn leh la puzawn an damloh mek avangin erawh chuan rilru a phir reng mai a. An natna te a nat em avangin dik tak chuan eng hunah pawh kal mai thei an ni a, one day at a time tih ang deuhvin ni khat te te kan chhiar a ni ber a, "Vawiin kan tluan ang em?' tih hi kan zawhna ber a ni ziah mai.

Ni tinin Mizoram kan phone thin mai a ni lo va, zing leh zanah kan phone a, hun awl zawng zawngah kan phone a, chanchin thar ber engnge kan zawt reng thin a. Hetiang boruak karah hi chuan anniversary lam lo sep rawtui viau a har hle a, birthday lo lam rik sek pawh a rem mawlh lo. Chuti chung chuan kan zia awm deuh takin tiin kan hun pawimawh hman dan tur chu kan hisap ru reng a. Chhungkua a hun hman hun a nih vangin khawiah nge kan kal ang a, khawiah nge dinner kan ei chhuah ang tih chu kan dap ru reng tho.

Kan chhungkua hian kalphung ang rengah kan neih ve tawh a, mite angin engmah han lawm ropui thei kan nih loh avangin kum special bik te a nih loh chuan khawiah emaw chaw kan ei chhuak ho dam dam thin a. Restaurant kan la kal ngai lohna hrang hrang te kan chhin kual ve a, nuam kan ti ve hle thin. Tun kum pawh hian kan la kal ngai lohna hrang hrang kan sawi khawm a, paruk lek e ti lo hian inlungrual kim thlap hi a har thin khawp a, a tawp khawkah chuan birthday neitu emaw kha veto power nei theitu a ni a, a ni thu a LAL ber thin!

Kumin chu pi leh pute dam loh kum a nih avangin hot takin thu a rel theih loh, thu tlukna awm fumfe lovin kan tangkhang reng a. A ni tak a lo thlen pawh chuan thumum kan la nei thei lo. "Chanchin chhia kan dawng thut mai ang a," tiin thaw dep depin kan awm reng mai a ni.

April ni 20 zingah pawh chuan Aizawl kan phone a, Civil Hospital ICU ah hian ka pa chu kar hnih zet a awm tawh a. Ashma a vei a vangin thawhah a nei a, oxygen pek mai tawk tawh lo va, a hrawk chu verhin ventilator an vuahsak tawh a. A chang chuan an tha viau thin a, a chang erawh chuan a hniam leh em em thin a. Hemi ni tak pawh hian a tha khawp a, ka u Pari chuan," Ka pa chu a tha khawp mai, kei pawh hei zanin chu ka pa kalsanin Maruati (kan nu) pa ka tlawh zawk dawn. Zanin hian a hniam zual deuh a ni," a lo ti a.

Kei pawh chu ngaihtha ang reng takin hna thawk turin ka chhuak a. Ka chhungte bulah pawh chuan, "Vawiin lamah zan ina kan dinner einna tur chu ka rawn confirm mai ang," tiin ka hrilh ve thlap a. "Eng em kan ti lo ang chu maw?" tiin ngaihtha ang reng takin hna lam ka pan a.

Chhun dar 12 a pelh hret hnu chuan ka thian Rev. Maruata, Atlanta chuan min rawn phone a. A ni nen hian kan inbe fova mahse hetiang anga chhun laiah hian kan in-phone ngai lo. Zan lamah kan in-phone ber a, chawhnu her fe-ah pawh kan in-phone zauh tawh bawk. Chutia hun lo taka min rawn phone takah chuan mak ka ti ang reng takin phoen chu ka la a, zangkhai takin kan bia a.

"Pu Maruat eng thil nge ni ta?"

"Kha a zia lo hle mai a,"

"Eng nge zia lo ta? Eng thil nge zia lo a, han sawi teh khai."

"I pa kha maw le, i hre lo em ni aw...?"

"Hre hlei nem eng nge ka pa..."

"Facebook-ah ka hmu a, i pa in a kalsan ta che a ni chu..in hre daih tawh turah ka ngai a sin..."

Chu chu ka pa thih thu ka hriat dan a ni. Kan nu ka phone nghal a, a ni pawhin, "Ka lo haw nghal," a ti a. Tichuan lusun kan ni ta reng mai. Ka nu kan sun tawh a, ka pa kan sun leh ta.. a va BUL ta ve le. Amaherawhchu ka nu leh pa ten rei tak min dampui avangin Pathian chu fakin awm rawh se...

Pastor Rinawma'n hun serh min hmansak.

Kan chanchin hria apiangin min lenpui a, in leng chhum lo chat lovin kan nei a, zai te pawh a kan han zai ve a. Pastor leh Kohhran Upa te'n hunserh min hmansak reng a, kan tawngtai reng a, chuvang chu ani ang Pathian awmpuina kan dawng a, tuar hle chung pawhin kan tuar dan a ziaawm tlat. Tun hmaa nu leh pa sun tur anga ka inhisap thin lai khan tuar rual loh ni turah ka ngai a, mahse a hun a lo thlen chuan, Pathianin min chhawk nasa em em a, tuar thei turin min buatsaih ni berin ka hria a, ka lawm em em a ni. Mi lo leng zawng zawng te kha kan khawhar lunglen hlauva min hnemtu tura Lalpan a rawn tirh te an ni, an ropuiin an hlu em em a ni.

April 22 2012 Pathianni inkhawm pawh kan Kohhran Presbyterian Mizo Church chuan Biak in khar thakin kan inah min inkhawmpui a. Inkhawm pawh thusawi lam awm teh chiam lovin lengkhawm zai hun atan kan hmang a. Hlim takin kan inkawm khawm a, lusun tuar pawh a ziaawm hawp mai. Tlai thlengin in leng kan nei a, zan lamah pawh awm fual tawk an la awm zel a. A rem remin kan inah chaw te an ei nghal a, kan ri ve laih laih a.

Rev. Lalthanzaua'n hun serh a hmang.

Khua thim har tawh avangin zan dar 10. 30 awlsam tein a lo ri mai a, phone a rawn ri der der a, kan nu chuan a la vat a.

"Hello..Mami in dam em?" a va ti a.

Rawn betu chuan, "Hello U Maruat, awi a zia lo em mai, pawi lutuk.."

Kan thiante Mami Buchanan ten Pathianni khan lo len an tum thu an sawi tawh a, an lo lang ta si lo va, zana a rawn phone takah chuan, an lo leng lo thuphachawi ni ngei turah kan nu chuan a ngai hmiah a.

"Mami, zia lo ti duh suh a ho em mai.."

"U Maruat a ho em mai tih chi pawh a ni lo, a pawi lutuk i pa kha.."

"Ka pa maw enga ti nge ka pa?"

"Awi in la hre na nge, awi.. sawi loh tur ka sawi a niang.. i pa kha a boral. Aizawl atangin min rawn phone a...ka sawi ve ri ngawt a.."

Chu chu ka puzawn Pu R. Chhingliana kum 77 boral thu kan hriat dan a ni leh ta! Inhnaihte teah kan nupain kan pa te ve ve kan sun chu a ni ta reng mai. Ruang kil pha ve si lovin. Ka pa thianpa Pu Lalthangliana Sailo lo leng pawhin, "Kum 88 ka ni tawh, in tawn ang hi tawng ka la hre ngai lo," a ti hial reng a ni.

Ka pa leh ka pu chanchin te ka sawi a.

Ka pa pawh kan sun fel hma hmain ka puzawn kan sun leh ta a, kan in leng ka pa thih avanga lo leng, tlingtla tawha inngai te pawhin lu kan sun nawn leh tak avangin an lo leng nawn leh a. Mi tam tak chuan an tih dan ngai tein ei tur leh in tur chi hrang hrang an rawn khai lut leh thluai thluai a, aw mite kan va tihekin kan va tirim zo zai tak em! Kan duh thu lah a ni der si lo. Miten min khawngaih a, zalen taka lu kan sun theih nan in chhung chetah te min zangkhai nasa hle. Ka pa chauh kan sun lai chuan kan nu hian in chhung chet a la thei viau a, mahse ama pa ngei an sun ve leh zel takah chuan inphut tur kan awm ta lo. Lu kan sun veng veng tawh mai a ni.

Hetia kan lusun thu kan chhungte atang ni lo, thiante atang daih a kan hria hi a mak khawp mai a. Kan hriat hma daihin midangin an lo hre hmasa hi mak kan ti, mahse Pathian remruat a ni tlat lawi si. Kan pate an dam loh lai hian Maruati hian a nau te hnenah, " Engpawh nise kan chungah a chhe ber a lo thleng a nih pawhin, min rawn phone lo ula, duh leh text in min rawn hrilh rawh u. Chuti lo chu ka tuar zo lo ang," a lo ti diam tawh a. Chu chu hriain Pathianin fel takin ro a rel a, kan tlin tawk turin thiantha ka atangin kan lo hre ve ta a ni, a ropui lutuk a Pathian chu fakin awm rawh se.