Mizoram ID..

Mizoramah chuan Zawlaidi a lar hle mai a, a ruih theih an ti a, an lawm phian a ni. Mi tam takin an dem a, a thenin an chawimawi a, hralh pawh a tla ngiang ni tur a ni.

He Zawlaidi hi grape an thar ve rah tanga siam a ni a, chu grape chu thur tak, a lawnga ei hleih theih loh khawpa thur tui lo a ni  an ti a. Chuti taka tui lo chu engvanga ching reng reng nge maw an nih le ka ti thin! A tui chi chin mai awm, tih chu ngaihdan tlanglawn tak a ni.

Kut hnathawktute thawh rah sum chang tura buatsaihsak chu a pawimawh ngei mai a, mahse zu khap mek laia zu tho chi dang phalrai si hi awmzia chu a awm lo khawp mai. A hming chu eng pawh vuah se Zawlaidi a ni emaw, Tuitai, Daifim, Zotuithiang a ni emaw a eng a pawh chu a hming ni rawh se, zu a nihna chu alcohol content a tam leh tam lohah a innghat tho tho a, beer hi zu a nih chhung chuan Zawlaidi hi chu zu a ni chiang sa a ni. Kan thar chhuah anih avanga phalrai ngawt tur a nih chuan keimah ni thlawr ngei zupui, tinzu leh zufang pawh phalrai chi tho a ni dawn lawm ni?

Ram changkangah chuan ID(identification) hi an ngai pawimawh khawp a, tu nge kan nih chiah hriat nan khawi khawiah emaw phawrh a, thuneitute entir an ngai thin. Zawlaidi hi  kan aiZOL ID, Aizawl entirna a ni  mai dawnin a lang a, hei lo deuh hi ID atan hman a a tha ngawt mai....