USA vrs MIZ.

Thil inrual tlang leh intiat takte ka khaikhin thin a, mahse tun tum chu an intiat vang ni lovin, an intluk tlan em vang pawh ni chuang hek lovin Mizoram leh USA han khaikhin zuai dawn a ni.

1. Miz. ah chuan 'lakluh milin khawsak i zir ang' tiin inrenchem kan sawi uar a, USA-ah chuan khawsakna mila sum lakluh a ngai mauh mai. Retheih avangin thil engmah a tlawm chuang lo va, kan harsat avangin kan standard a tih hniam ngawt theih bik loh. Chuvang chuan midang pha turin lakluh tam a ngai a, hlawh bi a tlem chuan thawh nasat  zual a ngai a ni mai.

2. USA-ah chuan a rethei leh chenbeh deuh ho khawpui lun lai leh veng hulumah an awm a, Miz. ah chuan a hausa sa a lun laiah an awm thung a, kawngpui an ngei mai kan thlang thin! USA ah chuan mi hausa leh khawsa thei ho chu fianrial tak takah an awm a, ngaw hnuaiah te an awm a. Miz. ah chuan rethei deuh ho veng tlabirhah kan awm thung. Kawng sira motor a inhung dul kan hmuh chuan Miz. ah chuan mi hausa venga ni a, USA ah chuan mirethei veng a ni daih thung.

3. Miz.ah  chuan kan hunbi chhiarna hi thlabi a nih vang a ni ang calendar hmuh tur hi a tam em em a, date hi kan hre reng thei thung lo va, officer lian pawh calender en zet lova vawiin ni hre thei mai lo an awm nual, thil reng reng a chet muan phah. Thingthlangah ngat phei chuan thla bi pawh ni lo; kumbi in hun kan chhiar a, kan thawh hlawh (lo neih) pawh kum khatah vawi khat, kum tawpah kan seng chauh va. Engkim hi a slow lo thei lo a ni. USA ah chuan thla bi ni lo, kar bi ni lo, ni bi pawh  ni lo, darkar bi a hna an thawh avangin dar kar biin hun an bih a; calendar te chu a lian lutuk a, ni bi pawh a lian lutuk a, darkar bi te khan hun an hre chat chat thei. Mak ka tih em em chu hming sign tir tur hian mi inah ka kal kual nasa a, tar te te pawh vawiin mi eng ni nge tia min zawt an awm ngai mang lo. An hre chat chat mai a ni.

4. USA ah chuan mipui nunphung ti khaihlak zawnga mi tute lungawi lovin emaw a bandh te, strike te, highway/road block an siam te hi hriat tur a vang khawp. Miz. ah erawh chuan mahni harsatna tarlang tura mipui tibuai thui thei thei hmai uang thuang an ni mai niin a lang.

5. Miz. ah chuan miin zu te drugs te a ruih chuan ama tan chang lo midang tan a pawi a, USA ah chuan mi an rui duh anih phawt chuan an indip lo. A ruih thiam loh viau chuan ama tan mai a pawi a, a man a tuar anga a ni mai.

6. Miz.ah chua miin thiam vak lova sap tawng a a tawng chuan kan nuih ru a, USA ah chuan sap tawng thiam loh avangin mi nuih a za ve lo.

7. Miz. ah chuan changkang nia inhria ten sa an ei tam a, USA ah chuan inti changkang ho chuan sa an pumpelh  a, thlai lam an uar thung.

8. USA ah chuan rethei an thau va, state rethei ber pawh Mississippi a ni a, thau uchuak an tam ber bawk. Miz. ah chuan rethei an thau mawh khawp mai. Thau tamna ber pawh, dist. hausa ber ni bawk Aizawl dist. a ni ngei ang.

9. Veng thar a pian dawnin kawng te, tui, electric, phone, tv., line engkim sign board thlengin an siam vek hnuah in an sa chauh va, Miz. ah chuan kawng awm hma hmain in kan sa a, in sak hnu ah kawng kan lai tan a; a hnu kum tam takah a dang chu a lo kal chauh!A then chu tun thlengin an la dah lo.

10. USA ah chuan thil engkim hi intlara tihfel vek a ni a, kal hmasa hi tuman an khalh ngai lo. Mi huaisar leh mawl deuh midang va hma khalh tum an awm chang pawhin kan va dawr tura te khan a kal hmasa kha an ko hmasa tho tho. Miz. ah chuan intlar thap hnu pawhin inzeh ruk, inhmakhalh ruk kan tum reng thova. Huaisar leh chuhhelh deuh an la hamtha zawk thei zel mai.

11. USA ah chuan Krismas te hi a ni tak thlen hma, ur lawk zan hian Kohhran prog zawng zawng chu an zo der a. Miz ah erawh chuan a i ni tak pelh hnuah a lawmna ruai te kan theh chauh!

13. USA ah chuan in sak zawh loh leh pamtul ka la hmu lova, sak zawh hmaa luah luh rawk ang chi ka hmu hek lo, Miz ah chuan zo thlep thlawpa inthar luah luh a awm mang lo, chhunzawm pah tura inluah luh a ni deuh vek mai. Kus Vala tawngkam takin, "Bang hmai lam kan zawh hi chuan char bang a lo tla bal leh hman tawh a," a tih  hi a dik thui hle.

14. USA ah chuan sorkarna changtu President te hi an inthlanna an tlin atanga rei lo teah an sam a tuak a, an cher a, an tar hmel zung zung mai. Miz. ah thung chuan sorkarna changtu te chu an thau sawt sawt a, an mum kang nghal zel!

15. USA ah chuan motor khalhtuten kea kal te kawng an kian a, Miz ah chuan kea kal ten motor lo kal kawng an kian thung.

16.USA ah chuan zirtirtuten naupang an hlau a, Miz ah chuan naupangin zirtirtute an hlau thung.

17. USA ah chuan hunin mihring a vawng a, Miz chuan mihringin hun an vawng thung.


Heng bak pawh hi a la tam thei ang mahse a thui thei dawn si a, duh tawk phawt mai ang u.