Mizoram vrs Tibet

                                 Tibet Lal In

                                                          Mizoram mi  naran in

A tua te pawh hian a thawk a phitin, "Mizo tawng hi chu Tibeto-Burman group a mi a ni," kan han ti thei thla zen hlawm a. Dik pawh a dik viau mai thei. A dik a nih chuan Burma leh Tibet chu kan pute an ni a, pi leh pute chanchin na na na chu  tlem a zawng tal hriat ve pawh a tha ang. Tawng lama kan thlahtu bul, min hringtute zingah Burma lam hi chu kan inhne hnai ren rawn bawk a, kan inhre tha  ang reng viau a, Nghapih, chiazan, Zenuichian, etc te thlengin kan hre tha hle a. A khingpui lehlam Tibet erawh hi chu kan hlat deuh bawk nen an chanchin hi kan la hre lo ang reng viau a.Shillong khaw vawt tak hnuaiah second hand zuar a thu sen vet vut ho khu kan hmuh phak awm chhun chu an ni mai a. Kan inhnimhnai zui lo ang reng khawp mai a. Kei hian an chanchin hre vak bik lo mah ila sawtpui a mual mual te in lo awm takin tlem a zawng in chai chhuak mai mai dawn teh ang.

Tibet hi khawvela ram sang ber a ni a. Ram sang ber han tih hian nun phunga sang leh khawsak sang lam a kawk lo va. An ram hi a altitude a san em avangin ram sang ber ( feet 16000 a sang)  an ni tawp mai a ni. An fin leh var vang a ni hran lo. Tute zu khawn chang lo emaw chuan sawi ta se, " An fin vang lam ni lovin, an dawihzep luat avangin ral lakah an tlan chhe zel a, a tlang chhip ber an tlan thleng a, "Thing lu bula zawng dan ang hlauh an ni tawh" lo ti ve chhen pawh ni se  an inhmeh ve viau tho ang. Ram sang ber an nih vang hian Roof of the World title pek an ni a, "Khawvel in chung" tihna ni ber awm tak  a ni. Mizo tawng mawi takin dah han tum talh ta ila, Tibet chu The Height tihna a ni miau avangin, "Zoram" kan ti ve thei tho awm e, an awmna hi a zo veh vawh em mai reng reng a!

An khawpui ber hi Lhasa an ti a, Lushai tih ziah sual palh ni mai awm a ni.  Mizoram khawpui ber hi Aizawl ni lovin Lunglei lo ni ta se chuan, Lhasa leh Lunglei chu a inkungkaih hnaih hmel ngawt ang. Lengzem lama lung leng zual te pawhin;

Tumah dang kan rim lawng Lengi,
London, Lhasa, Lunglei lam tluang an,
Kan nui hiau e lam ang letin.

te pawh lo ti ve ta mai mai  se; a inhmeh ve viau tho long maw!

Tibet hian thlarau lam hotu pakhat Dalai Lama an nei a. Hei pawh hi a hming tawpa "a" a awm miau avang hian keini chuan awlsam takin mipa ngei a ni tih kan hre nghal thei nia! Chu chang a ni lo kei ni pawh thlarau lam kan han tawng san tak tak hi chuan lam nuam kan ti a, Lama te Lami te kan nih ve nuaih thin hi reng a! Kan han dak tawh lah hian kei ni da hi chu kan han laktlak loh khawp a, ar veng tlak ngawr ngawr  hi kan ni chauh mai a. Tibet hotupa erawh hi chu a dak lai ber pawha lam thei 'Dalai Lama' a ni mauh mai a, ngaihsan awm tak a ni!